Триесет ичетири лица загинале минатата недела во напад на ирачките сили врз кампот Ашраф на иранските „муџахедини“ опозициски спротиставени на на режимот во Техеран, пренесува во четвртокот АFP повикувајќи се Фархан Хак, претставник на генералниот секретар на ОН, Бан Ки-Мун

„Познато ни е за пронајдени 34 тела на убиени во кампот Ашраф и околината. Се надеваме дека подоцна ќе дознаеме повеќе детали“, изјавил Фархан Хак. Претходно, претставници на движењето „Организација на муџахедините на иранскиот народ“ (ОМИН)  соопштија дека во нападот врз логорот биле убиени околу 28 луѓе, вклучувајќи и жени. Официјален Техеран следниот ден, го поздрави нападот на ирачките сили, истакнувајќи дека постоењето на логорот не е уставно. Официјален Багдад соопшти дека до крајот на 2011 г. ќе ги затвори сите логори коишто се наоѓаат на ирачка територија кои се бази на иранските „муџахедини“, чие постоење е причина за долготрајните тензии во односите меѓу двете соседни земји. Одлуката на Багдад за дејствување во кампот Ашраф претставува уште еден знак за подобрувањето на односите меѓу двете земји започнато по соборувањето на режимот на Садам Хусеин, кои останаа крајно влошени и по ирачко-иранската војна во периодот од 1980 до 1988 г. ОМИН е основана во 1965 г. од страна на иранските студенти кои си поставија цел да го соборат режимот на шахот лојален на САД и во Иран да се формира социјалистичка исламска република. Нејзините припадници го поддржуваа лидерот на Исламската револуција, Ајатолахот Хомеини против режимот на шахот, но набрзо по Исламската револуција во 1979 г., идеолошки се разијдоа со клерикалистите. ОМИН во Иран изврши голем број напади, од кои во еден беше убиен Ајатолахот Бехешти, еден од оние кои стоеја во самиот зародиш на Исламската револуција. Секакви активности на организацијата во Иран беа забранети, а одредите на „муџахедините“ во 1982 г. се преселија во Франција, а во 1986 г.  во Ирак, и со поддршка од Садам Хусеин редовно вршеа вооружените упади на територијата на Иран преземајќи субверзивни активности против Исламската Република Иран во целиот тек на иранско –ирачката војна (1980-1988). Според проценките на иранската влада, припадниците на ОМИН се одговорни за смртта на повеќе од 12 илјади ирански и повеќе од 25 илјади ирачки граѓани. Во 1997 г. американскиот Стејт-департмент официјално ја стави ОМИН на листата на светските терористички организации. Подоцна Вашингтон во неколку наврати ја доведе органзиацијата во поврзаност со Ал Каеда. По американската инвазија на Ирак, ОМИН беше неутрализирана и разоружана, но политичката активност на организацијата продолжи и натаму. Всушност, „муџахедините“  потпишаа примирје со САД, и нејзините припадници во странство повеќе не беа следени како терористи. Во јануари 2009 г. Европската унија ја избриша ОМИН од листата терористички организации, на која беше ставена во 2002 г. На оваа одлука, иранското министерство реагираше дека одлуката на ЕУ е спротивна на меѓународните норми и обврски на Унијата во борбата против меѓународниот тероризам.