Белата куќа денеска ја објави пошироката верзија од изводот од матичната книга на родените на американскиот претседател Барак Обама во PDF формат

Со овој потег Белата куќа сака да стави крај на расправата којашто во американската јавност ја поттикнаа шпекулациите од ткн „биртери“ ( birth – раѓање), тврдејќи дека американскиот претседател Барак Обама не е роден во САД па затоа според уставот не може да биде претседател на Соединетите држави. Поточно американскиот устав  определува дека претседател на земјата може да биде само лице родено во САД. „Претседателот верува дека одвраќањето на вниманието по прашањето за неговиот извод од матичната книга на родените не е добро за земјата. Тоа можеби е добро за политиката и добро за телевизијата, но тоа е лошо за американскиот народ и го одвлекува вниманието од многуте предизвици со кои се соочуваме како држава“, се наведува во соопштението што го издаде директорот за комуникации на Белата куќа, Дан Фејфер, а го цитира Reuters.Претседателот Барак Обама во 2008 г. го објави својот извод во куса верзија, но повеќето „биртери“ рекоа дека непрезентирањето на подолгата верзија од изводот од матичната книга на родените го отвора прашањето дали Хаваи се навистина родното место на Обама. Белата куќа досега ги игнорираше тврдењата на противниците и не одговараше на „биртерите“, но последните неколку седмици милијардерскиот претприемач Доналд Трамп кој се бори да ја добие републиканската претседателска кандидатура поведе медиумска кампања со којашто во преден план изби прашањето за местото на раѓање на претседателот Обама.„Во времето на големите последици за оваа земја, кога би требало да расправаме за тоа како можеме да ја освоиме својата иднина, да го намалиме дефицитот, да се носиме со високите цени на бензинот и да донесеме стабилност на Блискиот исток, Вашингтон уште еднаш е попречуван со неверодостојно прашање“, наведува Фејфер.„Претседателот се надева дека со овој чекор можеме да преминеме на расправата за поважните прашања за американскиот народ и за иднината на земјата“, се додава во соопштението.На прес конференција во Белата куќа по објавувањето на изводот, претседателот Обама  призна дека го забавувало и збунувало колку голем проблем станало неговото родно место.  Иако директно не го спомена Трамп, Обама забележа дека кога го објави својот план за намалување на дефицитот претходно во април, неговиот матичен лист а не економската иднина на САД доминирале во вестите цела седмица. Могулот на недвижностите и ѕвезда на риалити телевизиските шоуа, Доналд Трамп, денеска веднаш си ги припиша заслугите за објавување на документот. „Чувствувам дека сторив нешто навистина многу важно и почествуван сум со тоа’, изјави на прес конференција во Њу Хемпшир, Доналд Трамп. Тој напомена дека многумина одамна го барале тој документ, а тој е единствениот кој постигна Обама и да го презентира пред јавноста. Трамп оцени дека овој случај ќе го засили потенцијалот на неговата претседателска кандидатура. Истовремено Трамп најави дека тој и другите се’ уште ја проверуваат автентичноста на документите за раѓањето на Барак Обама докажувајќи дека нема лесно да ја остави главната тема на неговата кампања. Точно пред една седмица анкета на CBS News и The New York Times покажа дека четвртина од Американците сметаат дека претседателот Барак Обама не е роден во Соединетите држави. Вкупно во анкетата 25 отсто Американци велат дека Барак Обама е роден надвор од САД, а 57 отсто велат дека тој е роден во Америка. Останатите 18 отсто не знаат каде е роден нивниот претседател.Меѓу републиканците 45 отсто сметаат дека американскиот претседател Барак Обама е роден во друга земја, како и 45 отсто од поддржувачите на конзервативното народно движење „Tи парти“.Од крајот на претседателската кампања на Обама во 2008 г. беа раширени гласините дека тој е роден надвор од САД. Овој мит кој го шират ткн „биртери“ се’ уште опстојува во целиот мандат на Обама и покрај убедливите докази дека е роден на Хаваите, една од 50-те сојузни американски држави, што беше поткрепено и со објавувања на неговиот роден лист од 1961 г. во два хавајски дневни весника.Претприемачкиот тајкун Доналд Трамп последните седмици го врати во центарот на вниманието на јавноста ова прашање, инсистирајќи дека не е најуверен во потеклото на претседателот Обама.Додека Трамп го ползува ова прашање за да привлече повеќе внимание за неговата можна кандидатура за републиканската претседателска номинација, другите републиканци настојуваат да ја придушат оваа дебата. Меѓу нив е и претседателката на клубот на конгресмените со поддршка на „Ти Парти“, Мичел Бејчман, како и републиканската гувернерка на сојузната држава Аризона, Џејн Бривер, која неодамна стави вето на законот кој го отвора прашањето за потеклото на Обама.