Во две одвоени експлозии кои денеска се случија во Нигерија загинаа повеќе од 30 луѓе, јавија светските агенции, повикувајќи се на очевидци и полициски преставници.

Во две одвоени експлозии кои денеска се случија во Нигерија загинаа повеќе од 30 луѓе, јавија светските агенции, повикувајќи се на очевидци и полициски преставници. Агенцијата Итар-Тас наведува дека во експлозија на автомобил бомба која ја активирал бомбаш-самоубиец пред штабот на полицијата, во главниот град на Нигерија, Абуја,  загинале повеќе од 30 луѓе. Според очевидци полицијата пронашла 30 трупови на местото на експлозијата која била предизвикана од автомобил марка „Мерцедес“. Се уште никој не ја презел одговорноста за терористичкиот напад, но полицијата претпоставува дека зад неа стојат припадници на исламските ултра радикални екстремисти од групата Боко харам (Западното образование е грев). Агенцијата Ројтерс ја пренесе изјавата на портпаролот на полицијата Олусола Аморе, според кого автомобилот во кој бил самоубиецот бил сопрен од полицијата и преусмерен кон паркингот поради детална контрола. Ројтерс наведува дека неколку часа по експлозијата во Абуја, четири деца загинале во експлозија која се случила на североистокот на Нигерија, во државата Борно. Радикалната исламистичка група Боко харам е осомничена за речиси сите терористички напади кои се случуваат во Нигерија.  крај/ит-ро/нц