Ирачанците побараа да се дознае што се случило со 17 милијарди долари ирачки пари, кои биле дел од фондот со кој раководеле Американци, а кои биле наменети за обнова на земјата по воените години

Официјални американски преставници кои се обидуваат да влезат во трага на парите, наведуваат дека ирачката влада не соработува и дека досега не им бил овозможен пристап до банкарските досиеја со што би можеле да утврдат дали споменатите пари се проневерени. Парите наменети за реконструкција на земјата е болно прашање за Ирачанците, кои и покрај потрошените милијарди за обнова на земјата, се уште се соочуваат со недостиг на електрична енергија, лошо опремени болници и недоволен број на училишта. САД биле одговорни за управување со Фондот за развој за Ирак, кој е основан по инвазијата врз оваа земја во 2003 година. Во Фондот влегле пари од замрзнатиот имот на Садам Хусеин, од продажбата на нафта и од американската програма „нафта за храна“. Парите од Фондот за развој во најголем дел биле трошени преку агенциите на ирачката влада, што во прашање ја доведува и нивната улога кога станува збор за управувањето со овие пари. САД, сами, дополнително издвоија големи суми на пари за обнова на Ирак. Специјалниот американски инспектор за обнова на Ирак, надлежен за фондовите за обнова, објави два извештаи за користење на парите од Фондот за развој. Извештаите покажале дека не се знае каде завршиле 17 милијарди долари од овој фонд.