Свет
Бурата Арлен усмрти 11 луѓе во Мексико

Тропската бура Арлен којашто го погоди Мексико усмрти најмалку 11 луѓе а речиси 300 илјади останаа без покрив над главата, соопштија мексиканските власти.
Тропската бура Арлен којашто го погоди Мексико усмрти најмалку 11 луѓе а речиси 300 илјади останаа без покрив над главата, соопштија мексиканските власти.Ова е првата поголема бура оваа сезона на Атлантикот, која во четвртокот ги погоди источните и централните делови на Мексико, проследена со силни ветрови кои предизвикаа и лизгање на земјиштето.Бурата го зафати поголемиот дел од Мексико, со неа беа погодени 20 сојузни држави, вклучувајќи го и главниот град и неговата околина, како и монденското летувалиште Акапулко на Пацифичкиот брег. Според првичните извештаи, поради излевањето на реките и лизгање на земјиштето, без домови останале околу 278 илјади луѓе во 143 општини. Ураганските ветрови практично ги уништиле сите плантажи на шеќерна трска и кафе. Според предвидувањата на научниците од Националната метеоролошка служба на Мексико, оваа година се очекуваат 17 урагани, од кои осум во Тихиот Океан а девет во Атлантскиот Океан и Карипското Море. Во Атлантикот сезоната на ураганите почнува на 1-ви јуни.Минатата 2010 година, беше најдождливата сезона во Мексико, кога загинаа 125 луѓе, а речиси милион лица останаа без домови, додека вкупната штета беше проценета на четири милијарди американски долари. Сезона на ураганите со најкатастрофални последици во Атлантикот досега беше онаа од 2005 година кога американскиот брег беше погоден од четири урагани од кои и најсилниот Катрина во која животите ги загубија повеќе од 1.400 луѓе./крај/ро/ап/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Воз во Русија налета на експлозив поставен под шините

Во рускиот Белгородски регион воз налета на експлозивна направа, предизвикувајќи експлозија, објави гувернерот Вјачеслав Гладков на својот канал Телеграм.
„Според прелиминарните информации, возот налетал на експлозивна направа поставена под шините“, напиша тој.
Повредени нема, но оштетена е контактната мрежа на железничката пруга.
Железничкиот сообраќај е привремено во прекин. Сите служби за итни случаи се на терен.
Свет
Трамп бара имиња на странските студенти кои студираат на „Харвард“: Сакаме да знаеме од каде се

Американскиот претседател, Доналд Трамп, изјави дека неговата администрација сака имиња и земји на сите странци кои студираат на Харвард, сугерирајќи дека странските земји, особено оние кои се непријателски настроени кон САД, треба да придонесат за финансирање на образованието на нивните студенти.
„Зошто Харвард не соопшти дека речиси 31 отсто од нивните студенти се од странски земји, и додека некои од нив воопшто не се пријателски расположени кон Соединетите држави, тие не плаќаат ништо за образованието на своите студенти, ниту пак имаат намера да го направат тоа“, напиша Трамп на „Тру соушал“.
Тој истакна дека неговата администрација сака да знае кои се и од каде се странските студенти и додаде дека Харвард „не е многу отворен“.
„Ги сакаме тие имиња и земји“, рече Трамп.
Според податоците на Харвард, во оваа учебна година 27 отсто од студентите доаѓаат од странство, а најмногу се од Кина, Канада, Индија, Јужна Кореја и Велика Британија.
Во учебната 2024-2025 година на Харвард беа запишани 6.793 студенти на додипломски и магистерски студии од 147 земји.
Странските студенти немаат право на какво било федерално финансирање, според делот за финансиска помош на веб-страницата на Харвард, додавајќи дека колеџот има свои пари за стипендии, кои се достапни за странски студенти.
Свет
Малта ќе ја признае Палестина следниот месец

Премиерот на Малта, Роберт Абела, денеска најави дека Малта ќе ја признае државата Палестина следниот месец.
Соопштението дојде за време на политички настан на кој Абела ги покрена локалните и глобалните прашања, со посебен фокус на хуманитарната криза во Газа, пренесува „Малта тудеј“.
„Не можеме да ги затвориме очите пред оваа човечка трагедија која секој ден се влошува“, весникот го цитираше малтешкиот премиер Абела осврнувајќи се на израелското бомбардирање на Газа, во кое загинаа речиси 54.000 Палестинци.
Абела рече дека овој потег е морална одговорност и дека Палестина ќе биде признаена по конференцијата на 20 јуни.