Израелскиот премиер Бенјамин Нетанјаху во интервју за „Еј-би-си Њуз“ изјави дека не ја исклучува можноста за атентат на иранскиот врховен лидер ајатолахот Али Хаменеи, тврдејќи дека таквиот потег нема да го ескалира конфликтот, туку ќе му стави крај.

Прашан директно дали Израел ќе го гаѓа врховниот водач, Нетанјаху одговори: „Го правиме она што треба да го направиме. Веќе ги гаѓавме нивните врвни нуклеарни научници. Имаме уште работа на други локации“, додаде тој.

Нетанјаху, исто така, рече дека нападите на Израел врз Иран се насочени кон, како што рече, заштита на човештвото од иранската нуклеарна закана.

„Денеска цел е Тел Авив, утре би можел да биде Њујорк“, рече Нетанјаху. Ја разбирам политиката „Америка прва“, но не ја разбирам „Америка мртва“.

Претходно Ројтерс објави дека актуелниот американски претседател Доналд Трамп го одбил предлогот на Израел за убиство на ајатолахот Хамнеи, повикувајќи се на двајца високи американски функционери. Според нивните тврдења, предлогот бил претставен во последните неколку дена, но Трамп ставил вето на планот.

Нетанјаху ги негираше тие тврдења во интервју за Фокс њуз: „Има многу лажни извештаи за разговори кои никогаш не се случиле и нема да навлегувам во тоа. Но, можам да кажам дека ќе го направиме она што треба да го направиме. И мислам дека САД знаат што е добро за нив“.

Тој додаде дека израелските напади ќе престанат само кога ќе бидат отстранети сите ирански нуклеарни капацитети.

Ајатолахот Али Хаменеи, кој има 85 години, е врховен лидер на Иран од 1989 година и е најмоќната политичка и верска фигура во земјата. Нејзиниот авторитет ги надминува сите други институции, вклучително и претседателот и парламентот, и има клучна улога во обликувањето на надворешната политика и нуклеарната програма на Иран.

Израелските одбранбени сили (ИДФ) објавија дека цел на воздухопловните сили бил центар за комуникација што го користат иранските вооружени сили за воени цели, откако беше извршен напад врз зградата на иранската државна телевизија.

Во соопштението се наведува дека зградата била користена за воени активности „под превезот на цивилна акција“, и дека нападот „директно ги ослабнал воените способности на иранските сили“.

„Пред нападот, ИДФ му обезбеди на цивилното население ефективно навремено предупредување, вклучително и телефонски повици, а нападот беше извршен прецизно, за да се избегнат цивилни жртви што е можно повеќе“, се вели во соопштението.

Израелските одбранбени сили (ИДФ) извршија напад врз информативната мрежа на Исламската Република Иран (ИРИНН), која ја води државната медиумска куќа ИРИБ. Иран објави дека има жртви во нападот.

На „Икс“ се појави видео на кое се гледа програмата на таа иранска државна телевизија. Програмата била прекината во моментот на ударот.

Австралискиот државјанин со српско потекло Живан Радмановиќ (32) е убиен во вила на Бали, додека неговиот пријател е тешко повреден. Индонезиската полиција верува дека станува збор за пресметка помеѓу криминални банди.

Австралиските медиуми објавија дека индонезиската полиција верува дека ги идентификувала маскираните напаѓачи одговорни за смртта на Радмановиќ, австралиски државјанин кој дошол на Бали од Мелбурн.

Радмановиќ бил убиен во бањата, додека неговата сопруга се криела од напаѓачите под прекривките на креветот во спалната соба, пренесе Н1.

Пријателот на Радмановиќ, Санар Ганим, бил претепан и застрелан со неколку куршуми во нападот, но успеал да преживее.

Индонезиската полиција соопшти дека сопругата на Радмановиќ среде ноќ ја разбудиле врисоците на нејзиниот сопруг. Како што рекла, се сокрила под покривката, а додека ја покривала главата здогледала маж во светло портокалова јакна со темен шлем на главата.

Таа на полицијата и кажала дека додека ѕиркала, видела како маж пука во нејзиниот сопруг во бањата пред да побегне. Набргу потоа слушнала друга жртва, Ганим, како вреска и истрели од неговата соба.

Истрчала од спалната соба и го затекнала пријателот на нејзиниот сопруг како крвари, а нејзиниот сопруг лежел на подот во бањата.

Австралиските медиуми јавуваат дека Радмановиќ и неговиот пријател во последните неколку месеци живееле на Бали, а веќе и биле познати на полицијата во Викторија.

Вилата во која се случило злосторството имала три соби и вкупно пет гости во моментот на нападот. Покрај жртвите, биле и нивните сопруги и уште еден непознат.

Полицијата нападот го третира како нарачано убиство, а се претпоставува дека напаѓачите се од Австралија. Се сомневаат дека избегале од Бали, но дека се уште се во Индонезија каде доколку бидат уапсени и осудени им се заканува смртна казна.