Свет
САД почна со повлекувањето на војниците од Авганистан

САД започна со повлекувањето на своите војници од Авганистан, јавува во петокот AFP повикувајќи се на командантот на американскиот контигент мајорот Мајкл Вун
Како што изјави мајорот Мајкл Вун, во средата од Авганистан полетаа околу 650 војници претходно стационирани во провинцијата Парван. „Овие војници се првите кои заминуваат од Авганистан без промена на ротирачка основа со нови сили по најавата на претседателот на САД“, го цитира Agence France-Presse мајорот Вун.Американскиот претседател Барак Обама на 22 јуни годинава изјави дека САД има намера да повлече во 2011 година од Авганистан – 10 илјади војници и да го намали американското воено присуство во земјата почнувајќи од јули. До летото 2012 година од Авганистан треба да бидат повлечени 33 илјади американски војници, или околу една третина од вкупниот број американски војници во оваа земја. Контролата над безбедноста во Авганистан, конечно ќе им биде предадена на локалните власти во 2014 година. Претходно, претставниците на американската воена команда соопштија дека во јули од Авганистан ќе бидат повлечени околу 800 членови на вооружените сили на САД. Во операциите во Авганистан учествуваа мултинационалните контингент на анти-терористичката коалиција, која е предводена од претставници на командата на американските сили, како и контингент од мисијата ИСАФ под команда на НАТО. Главните цели на двата контингента е, борба и уништување на припадниците на милитантното екстремистичко исламско движење „талибани“ и на глобалната терористичка организација Ал Каеда. Повод за почетокот на инвазијата и натамошните операции на САД и неговите сојузници меѓу кои и Република Македонија, во Авганистан беа терористичките напад врз САД извршени од припадници на Ал-Каеда на 11-ти септември 2001 година, кога со киднапирани патнички авиони беа извршени неколку терористички акти од кои најголемо беше уривањето на ткн Кули близначки од њујоршкиот Светски трговски центар, во кои загинаа повеќе од три илјади луѓе. Според западните медиуми, од почетокот на операциите во Авганистан загинаа најмалку 2.589 странски војници, од кои 1.664 се Американци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Путин до Западот: Купија билет и не патуваа, само за да се налутат на кондуктерот: рускиот енергетски систем работи беспрекорно

Рускиот претседател Владимир Путин изјави дека одбивањето на европските земји да се потпираат на руските енергетски ресурси сериозно ја поткопа конкурентноста на нивните економии и доведе до пад на индустриското производство и пораст на цените низ целиот континент.
Зборувајќи на пленарната сесија на Руската недела на енергија во Москва, Путин истакна дека постапките на западните политички елити „ја уништија глобалната енергетска инфраструктура“, нагласувајќи дека политичкиот притисок довел до ирационални одлуки во ЕУ, според западните медиуми.
„Многу европски земји, под политички притисок, одбија да купуваат руски енергетски производи. Веќе неколку пати предупредив за последиците – не за Русија, туку за самите тие земји. Гледаме пад на индустриската активност и пораст на цените поради поскапата нафта и гас од странство“, рече Путин.
Тој додаде дека, по забраната за соработка со Русија, западните компании почнаа да ја губат својата технолошка предност и да го намалуваат производството, додека руските експерти станаа „технолошки лидери“ на пазарот.
„Што направија? Купија билет и не патуваа – само за да се налутат на кондуктерот. Каква глупост.
Нашиот енергетски систем е еден од најголемите во светот. Овој огромен комплекс работи сигурно и ефикасно“, заклучи претседателот на Русија.
Свет
Кремљ: Путин го предупреди Трамп за време на разговорот

Во денешниот телефонски разговор, рускиот претседател Владимир Путин го предупреди американскиот претседател Доналд Трамп дека испраќањето крстосувачки ракети „Томахавк“ во Украина ќе го загрози мировниот процес и ќе им наштети на односите меѓу САД и Русија. Веста беше потврдена од Кремљ во официјално соопштение, пренесуваат медиумите во регионот.
Според Кремљ, Путин изразил загриженост поради можноста напредното американско оружје во рацете на украинските сили да доведе до понатамошна ескалација на конфликтот. Предупредувањето јасно посочи дека таков потег од страна на Вашингтон би имал директни негативни последици врз билатералните односи на двете сили.
Советникот на Путин, Јуриј Ушаков, им изјави на новинарите дека Путин во разговорот нагласил дека руските сили во моментов имаат „целосна стратешка иницијатива“ по целата линија на фронтот во Украина.
Ушаков додаде дека денешниот повик, кој траел речиси два и пол часа, бил инициран од руска страна. Тој, исто така, објави дека на планираниот нов самит меѓу двајцата претседатели ќе му претходи разговор меѓу државниот секретар на САД, Марко Рубио, и рускиот министер за надворешни работи, Сергеј Лавров, кој се очекува да се одржи во наредните денови, пренесува index.hr.
Фото: принтскрин
Свет
Орбан по разговорите Трамп-Путин: Голема вест за мирољубивите луѓе, подготвени сме

Американскиот претседател Доналд Трамп објави дека наскоро повторно ќе се сретне со рускиот претседател Владимир Путин, а овој пат средбата ќе се одржи во Будимпешта. Двајцата лидери се согласија за нов самит за време на телефонски разговор.
Унгарија е подготвена да биде домаќин на самитот Русија-САД, изјави унгарскиот премиер Виктор Орбан.
„Планираната средба меѓу американскиот и рускиот претседател е голема вест за мирољубивите луѓе низ целиот свет. Подготвени сме!“ напиша тој на X.
Трамп и Путин последен пат се сретнаа пред два месеци во Алјаска, но таа средба не донесе конкретен напредок кон мирот во Украина, по што следеше период на дипломатско затишје меѓу Вашингтон и Москва, анализираат медиумите.
Денешниот телефонски повик не беше објавен со денови, за разлика од некои претходни, а аналитичарите истакнуваат дека времето на неговото случување е исклучително значајно. Имено, Трамп утре треба да се сретне со украинскиот претседател Володимир Зеленски.
Клучната тема на нивниот разговор ќе биде можното испраќање американски ракети со долг дострел „Томахавк“ во Украина, што би претставувало значително зголемување на воената помош за земјата.
Фото: принтскрин