Финансиската криза во Европската унија однесе уште една „жртва“, премиерот на Шпанија, Хозе Луис Сапатеро кој претрпе тежок пораз на вонредните избори.

Финансиската криза во Европската унија однесе уште една „жртва“, премиерот на Шпанија, Хозе Луис Сапатеро кој претрпе тежок пораз на вонредните избори.

Сапатеро за помалку од еден месец е трета жртва на должничката криза. Премиерите на Грција и Италија, Јоргос Папандреу и Силвио Берлускони мораа да ги напуштат своите функции по кратка постапка.

Минатата година поради тоа „паднаа“ претседателите на владите на Португалија и Ирска, Жозе Сократеш и Брајан Коен.

„Пред нас е тешко време. Ќе се борам против дефицитот, големите долгови, економската стагнација и сè што ја погодува нашата земја во овие критични околности“ истакна новиот шпански премиер Маријан Рахоја свесен дека се соочи со најголемиот предизвик во кариерата.

Со доаѓањето на технократот Марио Монти и Лукас Пападимос и сега лидерот на Народната партија во Шпанија кризата во еврозоната не е решена. Тоа е долгорочен проблем , кој што, како што се најавува, ќе биде главна тема на декемвриските разговори во Брисел.

„Кризата во Европската унија е системска и потребни се нови мерки и напори за решавање на финансиските и економските проблеми“ предупреди оваа седмица претседателот на Европската комисија, Жозе Мануел Баросо.

Стравот од продлабочување на кризата веќе го наметнува прашањето која е следната најслаба алка во еврозоната, која има 17 членови.

Според најновата листа на „Европлус монитор“, која што е неодамна направена на основа на конкурентноста, финансиското однесување и економскиот развој, во најлоша ситуација, покрај Грција се и Кипар, Португалија , Италија, Франција и Шпанија.

Со се поголеми проблеми се соочува и Словенија, а има и предупредувања дека Италија може со себе да ја повлече и Австрија иако таа засега има одличен бонитет.

„Франција е следната слаба карика во еврозоната“ предупредуваат финансиските експерти. Таа засега е подобра отколку Италија бидејќи има долг од 1.600 милијарди евра, но финансиските проблеми се се посложени.

Претседателот Никола Саркози е на мака бидејќи Франција влегува во изборна година. Владата во Париз на почетокот од месецов воведе мерки за штедење, за да обезбеди дополнителни приходи во државата од 65 милијарди евра.

Саркози меѓутоа, се воздржува од преземање на радикални потези, бидејќи се плаши дека тоа би можело да предизвика гнев кај бирачите на претстојните избори, особено што анкетите покажуваат дека сериозно заостанува зад социјалистичкиот кандидат за претседател на Франција.

Финансискиот колапс на Кипар и Португалија, или евентуално Словенија, западна Европа би можела да преживее. Но поголем потрес во Шпанија и Франција, две водечки економии на ЕУ, сигурно би го загрозила функционирањето на еврозоната./крај/тј/фф