Бугарската влада соопшти дека ќе го повлече контроверзниот предлог-буџет за 2026 година по масовните протести во главниот град Софија и во други градови низ земјата.

Десетици илјади луѓе учествуваа на протестите против предложениот буџет, за кој рекоа дека се обидува да прикрие широко распространета корупција во владата.

Некои демонстранти, со маски на лицата, се судрија со полицијата, претходно напаѓајќи ги просториите на владејачката конзервативна партија ГЕРБ, како и на партијата ДПС во Софија.

Владата сега соопшти дека ќе се откаже од предлогот, кој предвидуваше и повисоки даноци.

И минатата недела имаше протести, кога владата го достави предлогот до парламентот.

Буџетот за следната година ќе биде првиот што Бугарија ќе го усвои во евра, бидејќи земјата на 1 јануари се приклучува кон еврозоната.

Јавното мислење околу усвојувањето на еврото е поделено, а некои се плашат дека тоа може да предизвика висока инфлација во една од најсиромашните земји на Европската унија.

Протестите против корупцијата во власта се чести во Бугарија, со оглед на тоа што од 2020 година земјата ја водат краткотрајни влади.

Се проценува дека протестот синоќа бил најголемиот во Софија во последните години.

Поранешниот претседател на Хондурас, Хуан Орландо Ернандес, е ослободен од затвор во САД, каде што служеше 45-годишна казна за трговија со дрога и обвиненија поврзани со оружје, објави Американскиот федерален завод за затвори.

Ернандес е пуштен поради претседателско помилување што му го одобрил американскиот претседател Доналд Трамп, соопшти неговата сопруга Ана Гарсија. Таа наведе дека по речиси четири години „болка и тешки искушенија“, тој конечно е слободен човек.

Ослободувањето се случува неколку дена по претседателските избори во Хондурас, на кои Трамп го поддржа кандидатот Насри Асфура од Националната партија. Според последните резултати, Асфура и либералниот кандидат Салвадор Насрала се речиси изедначени со нешто под 40% гласови.

Асфура и неговата партија имаа блиски односи со Вашингтон за време на владеењето на Ернандес (2014–2022). Ернандес беше уапсен веднаш по напуштањето на функцијата и минатата година беше осуден, а пресудата ја нарече неоснована.

Украинскиот претседател Володимир Зеленски рече дека најпредизвикувачките елементи на мировниот план се прашањето за територијата и парите, осврнувајќи се на замрзнатите руски средства во Европа, како и безбедносните гаранции, но исто така дека сега повеќе од кога било постои шанса да се стави крај на војната, објави Би-Би-Си.

На прес-конференција во Даблин со ирскиот премиер Мајкл Мартин, Зеленски рече дека вчера разговарал со американскиот претставник Стив Виткоф, кој денес ќе се сретне со рускиот претседател Владимир Путин во Москва, и дека Украина сега ги чека резултатите од таа средба.

„Ќе реагирам според тие резултати, ако почувствувам дека можеме да сметаме на вистински, конкретен дијалог… ќе се сретнеме“, рече тој.

Украинскиот претседател, исто така, рече дека разговарал со Мартин за користењето на замрзнатите руски средства и дека е крајно време да се искористат за поддршка на напорите на Украина за војна и реконструкција.

„Крајно време е тие да се префрлат на Украина за да можеме сигурно да ја обезбедиме нашата одбрана и закрепнување, бидејќи тоа ќе ни користи не само нам, туку и на нашите партнери“, рече Зеленски.

Тој додаде дека Украина, исто така, смета на силни безбедносни гаранции и од САД и од Европа.

Во врска со мировниот план, тој рече дека некои работи „сè уште треба да се разработат“, но исто така рече дека САД преземаат сериозни чекори за да ја завршат војната „на еден или друг начин“.

Зеленски откри дека САД и Украина се согласиле за нов мировен договор од 20 точки. Украинскиот претседател рече дека оригиналниот план од 28 точки предложен од САД е преработен во нов договор по разговорите меѓу функционерите, објавува Индепендент.

„Сега повеќе од кога било постои шанса да се заврши оваа војна“, рече Зеленски.

Висок украински извор денес изјави дека украинската делегација би можела да се сретне со американскиот амбасадор Виткоф и зетот на Доналд Трамп, Џаред Кушнер, утре по нивните разговори во Москва.

„Украинската страна… не го исклучува тоа и е подготвена“ да се сретне со нив, изјави изворот, кој сакаше да остане анонимен, за агенцијата Франс Прес.

Тој ја спомена можноста за состанок во Брисел, каде што во среда се одржува средба на министрите за надворешни работи на земјите-членки на НАТО.

Државниот секретар на САД, Марко Рубио, нема да учествува на состанокот.