Поранешни израелски и безбедносни извори во петокот жестоко ја критикуваа акцијата односно начинот на кој француската полиција го изведе нападот во Тулуз во кој не успеа да го уапсат осомничениот жив и покрај долгото време и сите можности коишто ги имаше на располагање.

„Кој чека 30 часа да нападне кога нема заложници? Целата операција личи на демонстрирање на глупост“, тврди поранешниот командант на единицата за интервенции на израелската полиција и специјалните падобрански единици, Алик Рон во разговор за дневниот весник Maariv.

„Претпоставувам дека командата била да биде фатен жив, но за сé постои граница. Не смееше да му се дозволат 32 часа и уште да му се даде телефон за да може да разговара со кого сака и така да го направат во шахид (арапски збор маченик – з.р.) и јунак“, дополни Алик Рон.

Елитната француска полиција Raid не знаела да употреби „итрина и залажување“, овозможувајќи му иницијатива на Мохамед Мерах, изјави за израелскиот весник Yediot Aharono, поранешен офицер на безбедносните сили Лиор Лотан, кој денес раководи со центарот за истражување на тероризмот.

„Целта не беше многу комплицирана, еден, стан, еден изолиран бегалец, без експлозив, без заложници, во област којашто не е непријателска и не е боиште, туку на безбедносните сили им овозможува да се распоредат како што сакаат. Или се случиле грешки при планирањето на операцијата или биле принудени да започнат со акцијата пред да бидат довршени сите подготовки“, вели Лотан во разговорот со наслов „Неуспешна операција“

Поранешниот командант на единицата командоси Ури Бар-Лев за Maraav тврди дека акцијата „не било однесување на една професионална единица против тероризмот“, но додава дека „не е праведно“ да се критикуваат француските полицајци кои „немаат професионалност и искуство какво што ние го стекнавме борејќи се со тероризмот“

По пофалбите за француските власти и безбедносните сили за начинот на кој ја спроведоа истрагата и го открија Мохамед Мерах, осомничениот за седум убиства, на три војници, и три деца ученици во еврејското училиште во Тулуз и нивниот учител, израелскиот премиер Бенјамин Нетанјаху рекол дека Французите “треба да бидат пофалени“ и за акцијата во којашто се обидоа да го уапсат осомничениот.

„Француските власти работат како што треба и немаме право да ги осудуваме од безбедна оддалеченост, а да не ги знаеме сите детали“, рече Нетанјаху./крај/хи/сн