Млад египетски навивач е убиен а 20-ина се ранети во петокот навечер во градот Порт Саид во судирите меѓу навивачите на локалниот фудбалски клуб и војската во текот на протестите против одлуката за забрана за натпреварување на нивниот клуб поради крвавите судири во февруари.

Како што пренесе онлајн изданието на египетскиот дневен весник Аl Ahram, во безредијата било убиено 13-годишно момче а 16 лица биле посериозно повредени, неколкумина со прострелни рани а повеќето од нив се затруени со солзавец што го употребила војската за растерување на толпата навивачи на клубот Ал-Масри.

Навивачите протестирале против исклучувањето на нивниот клуб од натпреварувањата во Египет во следните две сезони и забрана за организирање мечеви пред публика во следните три години.

На 1-ви февруари во Порт Саид, на дербито меѓу домашниот Ал-Масри и фаворитот од главниот град Каиро, клубот Ал-Ахил кој тогаш го доживеа првиот пораз во сезоната (1:3), беа нападнати гостинските навивачи а во судирот на двете навивачки групи загинаа 74 лица а повеќе од стотина беа повредени. Што претставува најголема трагедија во историјата на египетскиот фудбал, по што беше заменета управата на Египетскиот фудбалски сојуз и месните власти во Порт Саид.

Демонстрантите на улиците на Порт Саид запалиле гуми, ги демолирале продавниците во центарот на градот. По обидите на воената полиција со интервенција да ги растури протестите, навивачите почнале да фрлаат со празни шишиња и камења.

Полицијата соопшти дека во толпата демонстранти имало провокатори,коишто истрелале неколку сачми кон војниците и кон навивачите./крај/аа/сн