Специјалниот пратеник на Обединетите нации и Арапската лига за Сирија, Кофи Анан во понеделникот побарал поддршка од Советот за безбедност 10-ти април да и’ биде одреден како краен рок на Сирија за делумно спроведување на неговиот план за решавање на конфликтот во оваа земја.

Како што пренесува Reuters повикувајќи се на неименувани дипломатски извори, Кофи Анан, во рамките на одредувањето на крајниот термин за почеток на неговиот план од шест точки за решавање на ситуацијата во Сирија, барал од Советот за безбедност на Обединетите нации и поддршка за целосен прекин на огнот 48 часа по овој рок.

Анан на Советот за безбедност зад затворени врати му соопштил дека Сирија се согласила на идејата за овој краен термин, кој би вклучувал престанување на движењето на воените единици кон населените места со повлекување на тешкото вооружување и почеток на повлекување на војниците, рекле за агенцијата дипломатите под услов да останат анонимни.

Засега нема сигнали дека сирискиот претседател Башар ал-Асад, ги исполнува своите ветувања дека ќе го спроведе планот на специјалниот пратеник ан аОН и Арапската лига, кој во прв ред предвидува прекинување на насилствата и почеток на политичкиот дијалог меѓу власта и опозицијата за „политичка транзиција“ на земјата, пишуваат западните медиуми.

„На теренот нема напредок“, изјавил за Reuters еден дипломат од состанокот, резимирајќи ги зборовите на Анан.

И покрај изостанувањето на напредокот, Анан на Советот за безбедност му рекол дека има одредени почетоци на спроведувањето на планот и побарал од членките на Советот „да започнат со разгледување на можноста за разместување на меѓународни набљудувачки мисии со широк и флексибилен мандат“, додал изворот на агенцијата/

Агенцијата на ОН за мировни мисии веќе почнала со плaнирањето на мисија на светската организација за надзор на прекинот на огнот во Сирија, којашто би ја сочинувале 200 до 250 невооружени набљудувачи. За таквата мисија неопходна е резолуција на Советот за безбедност а сé уште не е познато како Русија ќе одговори на поsледната сугестија на Анан.

Претходно во понеделникот шефот на руската дипломатија Сергеј Лавров во ерменската престолнина Ереван изјави дека се противи на какво и да е одложување или ултиматум во врска со почетокот на реализација на планот на Кофи Анан за Сирија.

Изјавата на рускиот министер за надворешни работи, Сергеј Лавров, следеше откако претходно во неделата на конференцијата на групата Пријатели на Сирија во турската метропола Истанбул беше упатен повикот на режимот на сирискиот претседател Башар ал-Асад да му се даде „краен рок“ за спроведувањето на планот Кофи Анан, заедничкиот специјален претставник на Обединетите нации и на Арапската лига за Сирија.

„Ултиматумот и вештачкото создавање одложување, ретко може да се покаже полезно. Кофи Анан доби мандат од генералниот секретар на Обединетите нации и од Советот за безбедност, затоа на Советот за безбедност е да оценува кој и како ќе ги спроведува неговите предлози“, се вели во писмената изјава на Лавров дадена при неговата посета на ерменската престолнина Ереван, тврдејќи дека учесниците на конференцијата во Истанбул не можат да го оценуваат спроведувањето на планот од шест точки за надминување на конфликтот во Сирија на Анан, туку тоа е во надлежност на Советот за безбедност на ОН.

Во саботата портпаролот на сириското министерство за надворешни работи Џихад Макдеши изјави дека „обидот за уривање на режимот во Сирија пропадна еднаш засекогаш“, и дека сириската армија ќе се повлече од станбените квартови, штом таму ќе се воспостави безбедноста и мирот.

„Борбата чија цел е да се урне сириската држава, засекогаш пропадна, а почнува една друга битка, битката за консолидација на стабилноста и изградбата на нова Сирија“, изјави портпаролот Макдеши /крај/мф/сн