Израелскиот премиер Бенјамин Нетанјаху се согласи да ја прекине воздушната офанзива врз Појасот Газа во текот на посетата на египетскиот премиер Хишам Кандил, пренесува AFP повикувајќи се висок израелски функционер.

Премиерот Бенјамин Нетанјаху го прифатил египетското барање на прекин на огнот во петок во текот на посетата на Појасот Газа на египетскиот премиер, која би требало да трае три часа, прецизира за агенцијата неименуваниот израелски функционер.

Додал дека Израел во одговорот навел дека израелските сили го прекинале огнот под услов да нема ракетаирања од Газа кон Израел во текот на посочениот период.

Египетскиот премиер Хушам Кандил во петокот наутро веќе пристигна во палестинската енклава Појасот Газа.

Израелската авијација изведе бројни воздушни напади врз Појасот Газа во петокот во мугрите, третиот ден од интензивната офанзива врз милитантните групации во областа.

Од средата навечер извршени се 130 воздушни напади, изјави портпаролот на министерството за внатрешни работи на палестинското движење Хамас под чија контрола е Газа, Ислам Шахван, при што напомена дека десетина напади се извршени во петокот наутро.

Според портпаролот на Хамас, од почетокот на израелската операција „Облачен столб“, убиени се 19 Палестинци меѓу кои има и деца и 235 се ранети.

Израелската војска соопшти дека извела 466 воздушни напади од почетокот на операцијата чија цел да се ликвидираат лидерите на милитантното крило на Хамас, во прв ред сега убиениот воен командант на Хамас во Газа, Ахмед ал-Џабари.

Исто така, Израел потврди дека и во текот на изминатата ноќ траело ракетирањето од Газа кон Израел. Од средата вкупно се истрелани 280 ракети врз Израел, од кои 131 биле пресретнати од израелскиот противракетен систем Iron Dome.

„Изборот на цели е направен врз основа на точни разузнавачки информации собрани претходните неколку месеци“, се наведува во соопштението на израелската армија од петокот наутро што го цитира РИА Новости.

Главните цели во текот на нападите од ноќта и раните утрински часови израелската армија го карактеризираше како „бомбардирањето на позиции од кои може да се лансираат ракети со среден дострел и магацини со оружје во Појасот Газа“, соопшти израелската армија истакнувајќи дека воздушните напади доведоа до намалување на интензитетот на палестинските напади.

Репортерот на РИА Новости јави дека имало најмалку 15 удари само во главниот град Газа. Израелските воздухопловни сили го бомбардирале најмалку двапати седиштето на министерството за внатрешни работи исламистичка влада на Хамас во урбана област на Тел ал-Хава, каде што имало пожари, а неколку лица се повредени.

Покрај главниот град Газа, извештаи за бомбардирања доаѓаат од северниот град Беит Ханун, Беит Лахиа, како и населби во централните и јужните делови на појасот Газа. Гаѓани се десетици полициски станици и други институции од структурата на вооружените сили под контрола на владејачката група Хамас.

Билансот на жртвите останува непроменет. На палестинска страна загинаа 19 милитанти и цивили, израелската – тројца цивили, чиј дом беше погодена од ракета./крај/мф/сн