Свет
Сеќавање на жртвите од катастрофата во Чернобил
Светскиот ден на сеќавањето на жртвите од нуклеарни катастрофи се одбележува во петок ширум Украина, Русија, Белорусија и светот, на 27 годишнината од хаваријата во Чернобил.
Уште пред зори беа положени венци и запалени свеќи пред споменикот на жртвите во Славутич, мето 50 километри оддалечено од Чернобил, каде што живееле повеќето вработени во нуклеарните централи, јави АФП.
Експлозијата и пожарот на 26 април 1986 година во нуклеарната централа Чернобил, во тогашен СССР активираа големи количества радиоактивност што се ширеше низ атмосферата. Смртоносниот радиоактивен облак загади 150.000 квадратни километри на Украина и соседна Белорусија, а се прошири и на Европа.
Семејствата и пријателите на жртвите одржаа комеморација во Киев, главниот град на Украина, која започна со бдеење на полноќ.
Во десет европски земји се одржуваат настани под мотото „За иднина без Чернобил и Фукушима”.
Според податоците на украинската влада, од последиците на озраченост умреле повеќе од 4.000 ‘чистачи’, пишува Еуроњуз.
Несреќата на Чернобил беше првата од ниво седум на Меѓународната скала за нуклеарни несреќи, а втората следеше четврт век подоцна, во јапонската нуклеарка Фукушима Даичи.
Чернобилскиот реактор 4 денеска е затворен со голем бетонски саркофаг, изграден во октомври 1986 година, за да овозможи работа на останатите реактори од нуклеарката.
Нов саркофаг веќе се гради во близина на постоечкиот и во 2015 година по шини ќе биде наместен на предвиденото место. Ќе содржи софистицирана опрема која ќе овозможи деконтаминација на внатрешноста на хаварисаниот реактор. Целокупната операција чини 1,5 милијарди евра.
Во август 2012 година Русија прогласи таканаречена зона на исклучување на 30 километри околу Чернобил. /крај/хн/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Уапсен уште еден осомничен за терористичкиот напад во Москва
Уште едно лице е уапсено во врска со терористичкиот напад на градското собрание Крокус во Москва на 22 март, соопшти денеска за „ТАСС“ портпаролот на полицијата.
„Уапсен е уште еден потенцијален осомничен во случајот со терористичкиот напад на Крокус. Инспекторите ја испитуваат неговата улога во тој напад“, изјави претставник на полицијата.
Полицијата уапсила државјанин на Таџикистан. Досега во врска со случајот се уапсени 11 лица, меѓу кои и четворица извршители на нападот.
Според последните податоци, во терористичкиот напад во концертната сала „Крокус сити хол“ во Москва загинале 145 лица.
Свет
Почина бебето кое беше извадено од утробата на мртвата мајка во Газа
Почина бебето кое во неделата со царски рез во Газа беше спасено од утробата на мртвата мајка, пишува Би-Би-Си.
Бебето е родено по итен царски рез извршен врз трудница која била убиена во израелски напад врз градот Рафа во Газа.
Освен мајката на Сабрин Ал Сакани, меѓу загинатите се и таткото на новороденото девојче и нејзината тригодишна сестра Малак.
Бебето при раѓањето тежело 1,4 килограми, а се родило во триесеттата недела од бременоста на мајката. Веднаш по царскиот рез беше сместено во инкубатор во болницата во Рафа заедно со уште едно бебе.
Но, девојчето после неколку дена почнало да има сериозни здравствени проблеми. Лекарите го реанимирале, но сепак починало вчера.
16 деца биле убиени за време на два воздушни напади на Рафа минатиот викенд, при бомбардирање на комплекс од станбени згради.
Израелските одбранбени сили (ИДФ) соопштија дека цел биле борците и инфраструктурата на Хамас и воените комплекси.
Свет
Британските разузнавачи: Русите се’ побрзо напредуваат во Украина
По заземањето на источноукраинскиот град Авдијевка, руските трупи напредуваат побрзо во областа, објави денеска британското Министерство за одбрана во своето секојдневно известување.
„Руските копнени сили навлегоа и создадоа тесен коридор на украинска територија со цел да влезат во градот Очеретин, приближно 15 километри северно од центарот на Авдијивка“, пишува на профилот на Министерството за одбрана.
Оцеретин во областа Доњецк имал околу 3.500 жители пред почетокот на војната.
И по заземањето на Авдијивка во средината на февруари, Русите се уште сметаат дека освојувањето на таа област е една од клучните операции, оценува британското Министерство за одбрана.
„Иако претрпуваат големи загуби, многу е веројатно дека руските копнени сили се во позиција континуирано да ги гаѓаат украинските позиции во областа и дека презеле контрола врз неколку помали населби“, додаваат тие.
Украина се брани од руската инвазија повеќе од две години. Британското Министерство за одбрана редовно објавува информации за напредокот на војната. Москва го обвинува Лондон за ширење дезинформации.