Најголемата австралиска телефонска компанија Телстра ја складирала електронската пошта и ги снимала телефонските разговори кои подоцна ги предавала на разузнавачките служби на САД на нивно барање.

Овие факти произлегуваат од договорот што во 2001 година го потпишале ФБИ и Министерството за правосудство на САД. Копија од договорот објави интернет страницата Крики, што е само потврда на документите што Едвард Сноуден на почетокот на неделата ги даде на увид на јавноста. Тоа потврдува дека САД може да контролираат огромен број податоци ширум светот.

Според информациите во документот, компанијата Рич, која ги поставувала каблите под морето, морала со компанијата ПЦЦВ да ја испраќа сета комуникација што се одвивала кон или од САД, во магацин кој „физички се наоѓал во САД, а од каде електронскиот надзор можел да се спроведува според законите на САД“. Компанијата Рич е заеднички проект на Телстра и Владата на Австралија, додека ПЦЦВ е корпорација од Хонг Конг.

САД барале пристап до сите телефонски повици што се одвивале меѓу Австралија и САД, но и меѓу други земји. Истото се однесувало и на комуникацијата преку електронска пошта. Компанијата Рич исто морала да дава податоци поврзани со телефонските разговори, информации за претплатниците и телефонските сметки на корисниците. Сите информации се чувале на американско тло на рок не помал од две години.

Зелените ја нападнаа Телстра и ја обвинија дека го нарушила австралискиот суверенитет. Телстра се брани дека „договорот на Рич всушност рефлектирал обврски кои морале да ги прифатат за да се ускладат со законот на САД“. /крај/ин/ст