Поранешниот руски претседател Дмитриј Медведев денес изјави дека Европската Унија се претворила во непријател на Русија што претставува директна закана за нејзината безбедност и дека Москва сега е против приклучувањето на Украина кон европскиот блок. Русија остро се спротивставува на членството на Украина во НАТО, што е една од причините што ги наведува за започнување на инвазијата на Украина во февруари 2022 година, но е многу поопуштена во врска со приклучувањето на Киев кон Европската Унија.

Рускиот претседател Владимир Путин изјави во јуни 2022 година дека Русија „нема ништо против“ тоа. Кремљ, исто така, во февруари оваа година изјави дека приклучувањето кон европскиот блок е суверено право на Украина.

„Брисел сега е вистинскиот непријател на Русија“

Сепак, Медведев, заменик-претседател на Советот за безбедност на Руската Федерација, истакнува дека ЕУ се претворила од економски блок посветен на спречување на војна во „политизирана антируска организација која постепено прераснува во воен блок“. „Брисел сега е вистинскиот непријател на Русија. Во својата сегашна, искривена форма, ЕУ не е помалку закана за нас од НАТО“, напиша Медведев на Телеграм.

Затоа, истакнува Медведев, сега е погрешно да се каже дека Украина може „слободно да се приклучи кон кого сака“ освен НАТО. „ЕУ, натоварена со оружје е директна закана за Русија. И токму така треба да се третира. Барем додека не го промени својот пристап кон нас. Значи, таканаречената идеја за Украина во Европската Унија е закана за нашата земја“, смета Медведев.

Тој потсети дека пред 15 до 20 години, Русија немала сериозни забелешки на плановите на Киев да се приклучи кон ЕУ во тоа време, наведувајќи дека шансите Украина да се приклучи кон Унијата биле минимални тогаш и дека Москва го гледала тоа како прашање на економски избор.

„Денес, старата Европска Унија повеќе не постои, сега е политички мотивирана глобалистичка организација со отворени русофобни ставови“, рече Медведев.

Украина аплицираше за членство во ЕУ на почетокот на војната во 2022 година. Минатата година доби статус на кандидат. Сепак, Медведев смета дека билатералната соработка меѓу Москва и некои членки на ЕУ треба да продолжи, без да прецизира за кои земји мисли.

Генералниот секретар на НАТО, Марк Руте, денес изјави дека рускиот претседател Владимир Путин не успеал во своите намери да го подели Западот, посочувајќи дека сите членки на Алијансата се обврзале да ги зголемат инвестициите во одбраната за пет проценти од БДП, како и дека Шведска и Финска неодамна се приклучија на НАТО.

Тој, сепак, предупреди дека Западот не треба да биде „наивен“ кога станува збор за Русија, осврнувајќи се на проценките на европските воени лидери дека Москва би можела да го нападне НАТО за три, пет или седум години, објавува Гардијан.

„Знаеме дека постои закана од Русија, краткорочна, долгорочна, што и да е, но заканата од Русија е таму и мора да се осигураме дека можеме да се одбраниме и затоа го правиме ова“, рече Руте.

Зборувајќи за Украина, Руте ја истакна потребата да се обезбеди сè што е потребно за таа земја да се „одбрани“ од Путин, додека работи на мировен договор.

„Очигледно, сите работиме на постигнување мировен договор или долгорочен прекин на огнот, а потоа мора да се осигураме дека Украина има сè што ѝ е потребно за да го спречи Владимир Владимирович Путин некогаш, некогаш повторно да се обиде да го направи ова во иднина“, рече тој.

Генералниот секретар уште еднаш ја изрази поддршката на НАТО за Украина и целта на таа земја за траен мир, посочувајќи на повеќе од 35 милијарди евра ветени на Киев досега оваа година, со планирано дополнително финансирање.

Руте рече дека договорот, кој беше поддржан од сите членки на НАТО, за зголемување на трошоците за одбрана на пет проценти од БДП до 2035 година, е амбициозна, но неопходна цел.

Тој процени дека овој договор ќе доведе до „квантен скок“ во колективната одбрана.

„Одлуките донесени денес ќе го направат НАТО многу посилно“, рече тој за време на прес-конференцијата одржана по самитот на НАТО во Хаг.

Руте истакна дека Шпанија, исто така, се обврзала на зголемување на трошоците, по обвинувањата дека Мадрид ќе го блокира тој план, додавајќи дека напредокот ќе биде разгледан во 2029 година.

„Како што знаете, тие мислат дека можат да ја достигнат целта од 2,1 процент, НАТО вели дека мора да биде 3,5, како и за сите други сојузници. Сите сојузници ќе известуваат за тоа како ги постигнуваат целите. Значи, ќе видиме, а во 2029 година, во секој случај, ќе имаме преглед на сето ова“, им рече тој на новинарите.

Руте рече дека Член 5 за меѓусебна одбрана на членовите на Алијансата е „апсолутно јасен“, но истакна дека НАТО никогаш не открива кога ќе биде активиран за да не им даде предупредување на непријателите.

Тој, исто така, рече дека има доверба во американскиот претседател Доналд Трамп, за кого рече дека е „силен“ и „човек кој се залага за мир“.

„Тој беше апсолутно во право дека Европа и Канада во основа не му обезбедија на НАТО она што ние треба да го обезбедиме и дека САД потрошија многу повеќе за одбрана отколку Европејците и Канаѓаните. Сега го корегираме тоа“, рече Руте, повторно пофалувајќи ги нападите на Трамп врз нуклеарните постројки на Иран.

Кога беше прашан зошто новата цел од пет проценти се однесува на сите земји, но не и на САД, Руте рече дека САД се „повеќе или помалку блиску до таа цел“ веќе, земајќи го предвид „огромниот капацитет на земјата кога станува збор за сајбер војна, сајбер криминал, хибридни закани, инвестиции во инфраструктура, развој на одбранбената индустриска база“.

Тој истакна дека Трамп е посветен на НАТО, тврдејќи дека „договорените цели покажуваат дека „сојузниците ја препознаваат сериозноста на заканите со кои се соочуваме и, како одговор, се собраа за да се договорат за амбициозна, но суштинска нова обврска за трошење на одбраната“.

Руте рече дека иако Трамп ја изрази својата посветеност на НАТО на тековниот самит, тој исто така истакна дека очекува Европа и Канада да инвестираат повеќе.

Одговарајќи на новинарско прашање за честите пофалби на Трамп, Руте истакна дека американскиот претседател ги „заслужува“ затоа што се залага за поголем одбранбен ангажман на другите сојузници на Алијансата.

Сојузниците на НАТО се согласија значително да ги зголемат трошоците за одбрана до 2035 година, поставувајќи нова колективна цел од пет проценти од бруто домашниот производ (БДП), беше објавено во заедничката декларација усвоена на самитот во Хаг.

Според документот, најмалку 3,5 проценти од БДП ќе бидат наменети за основни одбранбени потреби, додека дополнителни до 1,5 проценти ќе бидат насочени кон безбедносни трошоци како што се заштита на критичната инфраструктура и зајакнување на индустриската одбранбена база на Алијансата, објави Ројтерс.

Декларацијата ја потврди посветеноста на колективната одбрана од Член 5 од Повелбата на НАТО – „напад врз еден е напад врз сите“, но евентуалното членство на Украина во Алијансата беше изоставено, што претходно беше дел од слични документи, пренесува Танјуг.

Американскиот претседател Доналд Трамп направи споредба меѓу американскиот воздушен напад врз Иран и фрлањето на нуклеарните бомби врз Хирошима и Нагасаки во 1945 година, тврдејќи дека во двата случаи таквите напади успешно ставиле крај на војната, пренесува CNN.

„Не сакам да го користам примерот со Хирошима. Не сакам да го користам примерот со Нагасаки, но тоа во суштина беше иста работа која ja заврши тaa војна“, рече Трамп за време на НАТО-самитот во Холандија.

„Ова ја заврши оваа војна. Ако не го уништивме тоа, ќе продолжевме да се бориме“, додаде тој, говорејќи за нападите врз иранските нуклеарни постројки. Трамп во своето обраќање повтори дека американските напади, според него, го вратиле иранскиот нуклеарен програм назад за децении.

„Мислам дека никогаш повеќе нема да се обидат. Поминаа низ пекол. Им е доста. Последното што сега го сакаат е повторно да збогатуваат ураниум“, рече тој.

Aмериканската војска на 6 август 1945 година фрли нуклеарна бомба на јапонскиот град Хирошима, а три дена подоцна и втора бомба врз Нагасаки. Тоа беше прв и досега единствен случај во историјата кога нуклеарно оружје било употребено во војна.

Се проценува дека во тие два напада загинале најмалку 200.000 луѓе, најголем дел цивили. Јапонија неколку дена подоцна, на 15 август 1945 година, објави безусловна капитулација, со што заврши Втората светска војна во Азија. Историчарите сè уште се расправаат околу оправданоста на нападите, а нивниот разорен ефект остави длабока трага во глобалната безбедносна и политичка историја.