Ширум светот на 17 март се слави ирскиот национален празник, Денот на свети Патрик.

Денот на свети Патрик е традиција стара повеќе илјада години, а се празнува на 17-ти март, и тоа најмногу во Ирска. На денешен ден ирските семејства традиционално одат во црква. Големиот пост се прекинува на еден ден и луѓето танцуваат, пијат и јадат традиционални ирски јадења. Традиционални симболи на овој ден се детелина со три листа и зелената боја. На овој ден луѓето носат зелено, слават сé што е ирско на парадите со здравица и голема кригла пиво.

Сé до 1970 година ирските закони им забранувале на угостителските објекти да работат на овој ден. На почетокот на 1995 година, ирската влада започна кампања Денот свети Патрик да се искористи како реклама за туризам и промоција на Ирска.

Фестивалот што се одржува во понеделникот во Даблин се очекува да го посетат над милион луѓе. На Денот на свети Патрик ширум светот се пијат 10 милиони литри пиво Гинис, познат ирски бренд, тврди претставникот за медиуми од фабриката Гинис, Дејвис Рајан.

Празникот се прославува и во Америка каде што се одржуваат околу 100 празнични паради. Ова не зачудува поради тоа што околу 30 милиони американски државјани се по потекло од Ирска. Всушност, првата прослава на Денот на Свети Патрик се одржала во Њујорк, 17-ти март 1762 година. Ирските војници кои служеле во британската колонијална војска приредиле парада славејќи го своето потекло и наследство. Прослави се организират и во Австралија, Канада, но и ширум Европа.

Кој бил Свети Патрик?

Свети Патрик не бил Ирец. Роден бил во Британија 390 година во аристократско христијанско семејство, во раскошна куќа, со многу слуги. Како момче не покажувал интерес за христијанството. Кога имал 16 години неговиот свет се превртел. Бил грабнат и испратен далеку преку морето и седум години бил пастир во студените планини во внатрешноста на Ирска. За него тоа било застрашувачки, но тогаш се смениле неговите размислувања и станал голем христијански верник.

Народните приказни велат дека на Патрик во сон му се јавил глас кој му велел да избега. Нашол начин да дојде до пиратски брод и да се врати назад во Британија, каде повторно бил со семејството. Меѓутоа, гласот повторно му се јавил и му рекол да се врати во Ирска.

Станал свештеник, а потоа бискуп. Се вратил во Ирска и таму останал до крајот на животот. Животот му бил тежок – постојано бил малтретиран, ирските власти го затворале, додека британските постојано го предупредувале.

По смртта, на 17-ти март 461 година, Патрик бил заборавен. Но, полека почнале да се раскажуваат легенди околу него, а векови подоцна е прогласен за светец и заштитник на Ирците.

Патрик користел лист од детелина да го објасни Светото Тројство во христијанството, па затоа ова билка е симбол на празникот./крај/мф/сд