Измените на Кривичниот законик за заострување на казните за изборни нерегуларности и за злоупотребата на службените овластувања експресно ќе се најдат во веќе изгласаната форма пред пратениците в понеделник.

Измените на Кривичниот законик за заострување на казните за изборни нерегуларности и за злоупотребата на службените овластувања експресно ќе се најдат во веќе изгласаната форма пред пратениците в понеделник. Претседателот на државата Бранко Црвенковски одби да го потпише указот за законот, со обраложение дека така ќе се попречи борбата против криминалот.

Законот во иста форма во која го одби шефот на државата веќе е вратен до пратениците, а претседателот на Собранието Љупчо Јордановски ги известил дека за него повторно ќе гласаат на седницата в понеделник.

Официјално, пратеничките групи се’ уште не се координирале дали при повторното гласање ќе ги поддржат измените. Неофицијално се дознава дека тоа веќе било договорено помеѓу СДСМ и ВМРО-НП. Пратениците на двете партии вчера неофицијално зборуваа дека не може сега туку-така да го сменат ставот за злоупотребата на службените овластувања. Било договорено СДСМ да ги поддржи измените на Кривичниот законик во пакет со амандманот на ВМРО-НП, а за возврат партијата на Љубчо Георгиевски да обезбеди двотретинско мнозинство за законите за следење на комуникациите и за полиција.

Пратениците коментираат дека „гаранција“ дека законот повторно ќе добие поддршка е и тоа што при репризното гласање не е потребно двотретинско мнозинство, туку се потребни 61 глас. Ако пратениците повторно го изгласаат законот, шефот на државата мора да го потпише, но за тоа не е одреден рок.

При првото гласање законот го поддржаа сите пратенички групи освен ДУИ иако потоа во ВМРО-ДПМНЕ тврдеа дека тие не гласале. Во ДУИ вчера рекоа дека најверојатно повторно нема да ги поддржат измените за службената злоупотреба, бидејќи нивните аргументи се исти како оние на претседателот Црвенковски. Таму коментираа дека не е во ред да се амнестираат „функционерите криминалци“.

(М.Т.)