Автобуси од кои се вееја партиски знамиња, комбиња и коли, дел од карванот на владејачката коалиција, завчера место да платат патарина, без застанување ги одминуваа наплатните рампи

Автобуси од кои се вееја партиски знамиња, комбиња и коли, дел од карванот на владејачката коалиција, завчера место да платат патарина, без застанување ги одминуваа наплатните рампи

Автобусите, комбињата и колите на изборниот карван на Коалицијата "За Македонија – заедно", кои од сите делови на Македонија завчера дојдоа на конвенција во Скопје, не плаќаа патарина. Рампите на наплатните станици низ цела Македонија беа кренати за карванот. Се пропуштаа сите автобуси од кои се вееја знамиња на СДСМ и коалицијата, а рампата се креваше уште од далеку кога вработените на патарините ќе забележеа дека доаѓа автобус со изборен плакат од премиерот Владо Бучковски залепен на шофершајбната. Возачите на автобусите, место да платат, само им креваа рака на луѓето од патарините во знак на поздрав и без застанување ги одминуваа. Застануваа само колите и комбињата на кои немаше партиски ознаки. Тие на вработените на патарините само им кажуваа дека се со карванот и рампите се креваа.

Од наплатните станици завчера ни рекоа дека им стигнала наредба од Управата да ги пропуштаат возилата од карванот, па затоа без приговор ги кревале рампите. Тие мака мачеа со возачите кои не беа од карванот и од кои се бараше да си ја платат патарината, а пред нив минуваа возилата од карванот без воопшто да застанат.

Дуфе Кукоски, директор на "Македонија пат", во чија надлежност се наплатните станици, пак, вели дека тој не издал таква наредба.

"Јас не сум дал наредба, ниту сум кажал да се кренат рампите и да се пропуштаат возилата од карванот. Можеби возачите на автобусите сами си земале право да не плаќаат патарина, што често и се случува. Ниту некој ме прашал, ниту побарал од мене возилата да се ослободат од плаќање", рече Кукоски.

Борис Кондарко, портпарол на СДСМ, вчера ни рече оти не е точно дека автобусите кои доаѓаа во Скопје на митингот не плаќале патарина. "Секој прв автобус од колоната плаќал патарина за останатите за да нема застој во сообраќајот на наплатните рампи и на автопатиштата", ни изјави вчера Кондарко.

По десетина минути тој се премисли, па ни рече дека автобусите не платиле патарина, бидејќи договорот бил таа да се плати по конвенцијата и тоа на фактура.

Но откако поминаа уште десет минути Кондарко се јави со трета изјава.

"Во цената што ја плативме за автобусите што ги изнајмивме од транспортните претпријатија беше пресметана и патарината. Ние си дадовме пари за патарина, но не знаеме што се случувало на наплатните рампи", ни рече Кондарко.

Трите различни изјави Кондарко ги оправда со тоа што морал да се јави на многу луѓе, па целата работа станала расипан телефон.

И полицијата завчера не преземаше мерки против автобусите, колите и комбињата кои не плаќаа патарина. Тие се координираа со вработените на патарините и немо гледаа како возилата ги одминуваат рампите.

Екипата на "Вест" која завчера со свој автомобил го следеше карванот, на една од патарините си ја проба среќата. На зборовите: "Со карванот сме", рампата се крена без ниту едно дополнително прашање. (М.И.П.-И.С.)