Единствено е важно дека апаратот бил две-три години во употреба и има гаранција оти ќе работи без проблем најмалку пет години, рече директорот Андреја Арсовски

Единствено е важно дека апаратот бил две-три години во употреба и има гаранција оти ќе работи без проблем најмалку пет години, рече директорот Андреја Арсовски

На Институтот за радиологија, вчера беше пуштен во употреба репариран апарат за компјутеризирана томографија, со што пациентите отсега ќе чекаат покус период за снимање, односно една до две недели. Директорот на Клиничкиот центар Андреја Арсовски одби да одговори колку Центарот ќе плаќа за годишно одржување на апаратот на фирмата „Д-р Пановски“, иако станува збор за набавка во јавна здравствена организација.

– Договорот е деловна тајна. Единствено што е важно е оти репарираниот апарат бил две-три години во употреба, по што бил рефабрикуван и има гаранција оти ќе работи без проблем најмалку пет години. Од „Сименс“ го видоа стариот апарат, кој беше во дефект, и проценија дека поисплатливо е на Институтот да достават репариран КТМ отколку да го сервисираат постојниот, чија поправка би чинела околу 140 илјади евра, без гаранција дека нема брзо да се расипе – рече Арсовски на вчерашната прес-конференција.

Тој додаде дека на ваков начин ќе биде заменет и апаратот во Ургентниот центар. Репарираниот апарат е набавен во состав на годишниот договор за одржување што Клинички центар го има со фирмата „Д-р Пановски“, која била овластен сервисер на опремата од марката „Сименс“.

Поединечни точки од договорот не му се познати ниту на директорот на Институтот за радиологија, Миодраг Врчаковски, каде што апаратот ќе работи.

– Договорот е разгледуван во Фондот за здравство и министерствата за здравство и за финансии. Точно е дека апаратот е „секонд хенд“, но, иако е репариран, тој е со одличен квалитет. Тој бил користен само три години, а претходниот сопственик сакал да има 16 слајдови, а не четири, и затоа го вратил. Од апарат „мртовец“, кој неколку години беше надвор од употреба поради чести дефекти, добивме апарат кој е четирипати побрз од оној во Ургентниот центар, со кој досега се третираа сите пациенти. Ако досега се снимаа триесетина пациенти дневно, сега ќе може да се снимаат четирипати повеќе, со што ќе се намали и времето на чекање – рече Врчаковски.

Тој вели дека и зрачењето со овој апарат е помало за 35 отсто во споредба со стариот.

Фондот плаќа само за половина од прегледите

Иако, сега има доволно апарати на Институтот, според Врчаковски, и понатаму ќе имаат проблем со снимањата, бидејќи Фондот за здравство плаќа само за половина од извршените прегледи.

Полна цена на снимањето на компјутерскиот томограф чини 5.500 денари, а на магнетна резонанција 18.000 денари. Осигурениците на Фондот плаќаат партиципација од околу 20 отсто, но бројката на снимањата е ограничена.

– Фондот ни одобрува само пет снимања магнетна резонанција и 10 на компјутерски томограф. Другите пациенти и понатаму ќе се прегледуваат на товар на Институтот за да им се излезе пресрет на потребите на пациентите – вели Врчаковски.

Љубица Балаба