Вчера во истражното одделение во Основниот суд 1 во Скопје беа сослушувани тројца осомничени за злоупотреби направени во извршниот отсек каде со фалсификувани решенија од Буџетот на република Макеоднија биле земени над 50 000 евра

СЕ РАСЧИСТУВА КРИМИНАЛОТ ВО ИЗВРШНИОТ ОТСЕК ВО ОСНОВНИОТ СУД 1 ВО СКОПЈЕ

Вчера во истражното одделение во Основниот суд 1 во Скопје беа сослушувани тројца осомничени за злоупотреби направени во извршниот отсек каде со фалсификувани решенија од Буџетот на република Макеоднија биле земени над 50 000 евра

Јасмина Василевска, дактилографка во извршниот отсек во Основниот суд 1 во Скопје од вчера попладне е во притвор оти е осомничена злоупотреба на службената должност и овластување. Осомничената службеничка според сознанијата на истрагата со фалсификувани извршни решенија требало да издејствува да се исплатат пари од Буџетот на Република Македонија.

Парите легнале на сметка на адвокатот Кирил Смичковски кој исто така е осомничен за злоупотреба на службната должност и овластување. За истото дело пријава има и за адвокатката Биљана Николовска која работи со Смичковски во иста адвокатска канцеларија. За неа има уште една пријава за фалсификување. Заедно од Буџетот на Република Македонија со фалсификувани решенија зеле околу 50 000 евра. Тројцата осомничени вчера беа сослушувани пред истражен судија.

Дознаваме дека за адвокатите судијата не можел да одреди притвор оти Адвокатската комора не дозволила. Судот два пати барал од комората да дозволи притвор за нив, оти од обвинителтвото имало барање за спроведување истрага со предлог за притвор. Во одговорот на Адвокатската комора стоело дека барањето на судот ‘не е доволно аргументирано и не содржи доволно податоци за основаноста на барањето’. Управниот одбор на комората не дал согласност повикувајќи се на член 21 од законот за адвокатура донесен 2002 година во кој стои дека адвокатот во вршење на адвокатска дејност има имунитет и не може да биде лишен од слобода ниту притворен за кривично дело без согласност од Адвокатската комора на Република Македонија.

Криминалот во овој отсек бил откриен на 26 април годинава кога било откриено фалсификувано извршно решение. Од народна банка било добиено известување дека нив стигнало извршно решение под И број 476/06 од 29 март 2006 година и кое било неразбирливо. Била спроведена внатрешна контрола при што било утврдено дека било злоупотребено име на судија бидејќи во предметот кој што го работел судијата воопшто не фигурирале странките кои биле наведени во фалсификуваното решение. Според доставната книга дента во Нардона банка иако биле подготвени повеќе решенија, било однесено едно фалсификуваното решение за кое доставувачот кажал дека било по ургенција на дактилографката. Дактилографката веднаш беше суспендирана. Истрагта која ја работеле од одделот за организиран криминал во обвинителтвото открила дека биле направени четири вакви фалсивикувано решенија.