Владата на Република Македонија финансирала книга во која за Македонците од источниот дел на земјава се тврди дека се Бугари, а оние од западниот дел дека се Албанци.

СО ДРЖАВНИ ПАРИ ПРОТИВ ИДЕНТИТЕТОТ

Иван Блажевски

Владата на Република Македонија финансирала книга во која за Македонците од источниот дел на земјава се тврди дека се Бугари, а оние од западниот дел дека се Албанци.

Освен тоа, во книгата Македонците се именуваат како „славомакедонци“, државава како БЈРМ, а бегалците од Егејска Македонија, како „грчки колонизатори“.

Станува збор за книгата „Населението и албанските населби во Македонија“, издадена пред извесно време во Куманово, во која Фаузи Скендери, професор од Тетовскиот универзитет, тврди и дека речиси сите православни Македонци во западна Македонија се всушност православни Албанци.

Оние, пак, од источниот дел на земјава се плашеле да кажат дека се Бугари оти власта во Скопје била просрпска.

„Етничката структура во албанските предели е променета откако се доселија грчки колонисти со наводно македонско потекло од северна Грција. Овие колонизатори постојано низ годините предизвикуваа конфликти со автохтоното албанско население“, пишува во книгата.

Понатаму се додава: „Во западна Македонија денеска живеат околу 300.000 православни Албанци во регионите на Гостивар, Дебар и Кичево, кои за време на Втората светска војна беа под пресија на МПЦ и СПЦ и се асимилираа“.

Во делот каде што се пишува за деталната структура на населението се наведува дека не постојат Македонци со муслиманска вероисповед, туку станува збор за Албанци, а во голем број табели покрај графата „Турци“ во заграда се наведува „Албанци“. Во поглавјето за источна Македонија (државава е наведувана и како БЈРМ) авторот тврди: „Жителите источно од Вардар се со бугарска свест, но од страв поради просрпската власт во Скопје не се изјаснуваат јавно за тоа“.

Во врска со Македонците, во книгата што ја финансирало Министерството за култура на Република Македонија, а ја носи шифрата ЦОБИСС.МК ИД 64247562 и е архивирана во Народната и универзитетска библиотека во Скопје, понатаму се редат изрази како: „славомакедонските псевдодемографи“, „славомакедонците“, „Словените во земјава“, „Словените ги окупираа албанските простори“ итн.

Пред неколку месеци и од Катедрата за албански јазик и книжевност на Филолошкиот факултет во Скопје беше издадена книга за речниците на Ѓорѓија Пулевски. Таму авторот напиша дека населението во Галичник и во другите мијачки малорекански села има „неопределен идентитет“. Тоа наиде на силни реакции кај жителите од овој крај. Во нашиот весник тие објавија писма и ги обвинија албанските научници дека сакаат Македонците од Мијачијата и Горна Река да ги албанизираат.

Аслан Селмани: Тоа не е високонаучна книга

Министерството за култура не видело проблем

„Време“ ги праша раководителите на Министерството за култура врз основа на кој критериум ја финансирале книгата?

– Таа е регуларно објавена во согласност со одлуките на Комисијата за издаваштво во нашето министерство. Информациите за содржината на книгите ни доаѓаат од апликациите на Комисијата и содржината на оваа била позната – ни изјави портпаролот Тодорче Тасевски.

Демографот Аслан Селмани, еден од рецензентите на книгата, вели дека делото не е од висок научен степен, а на прашањето како го оценува делот каде што се обработени Македонците, тој вчера ни изјави: „Авторот цитира српска литература, албански, бугарски и македонски научници. Во книгата има податоци, но не можеме да кажеме дека станува збор за висока наука, авторот дава и коментари кон содржината“.

„Време“ вчера во Тетовскиот универзитет го бараше и авторот на книгата Фаузи Скендери, кој таму предава во одделот за географија, но до затворањето на весникот не добивме врска со него.