Истиот заменик-јавен правобранител, како и во „Бачило“ не поднесол жалба на пресудата за обесштетување на фирмата на Љупчо Палевски

АНТИКОРУПЦИСКА ОТКРИ „БАЧИЛО“ ВО ЦЕНТАРОТ НА СКОПЈЕ

Истиот заменик-јавен правобранител, како и во „Бачило“ не поднесол жалба на пресудата за обесштетување на фирмата на Љупчо Палевски

Државата неосновано му исплатила повеќе од еден милион евра на Љупчо Палевски, сопственик на „УПА Ентерпрајс Љупчо ДООЕЛ“ од Скопје за рушење објекти поради тоа што јавното правобранителство не поднело жалба на пресудата на првостепениот суд, соопшти вчера Државната комисија за спречување на корупцијата.

„Дневник“ дознава дека заменик-јавниот правобранител што учествувал во овој процес е Миодраг Стефановиќ, кој и во случајот „Бачило“ не поднесол жалба на пресудата за отштета исплатена на Иснифарис Џемаили. Антикорупциската формирала предмет за случајот, отворен врз основа на ревизорскиот извештај за работата на Министерството за транспорт и врски.

„Комисијата утврди дека постојат основи за сомневање дека во случајот станува збор за незаконитост и корупција.

Државниот, односно буџетот на Министерството за транспорт и врски е оштетен за 70.676.000 денари или 1.149.203 евра. Комисијата смета дека постои основано сомневање во основата за досудување, висината и исплатата на надоместот на штета на УПА Ентерпрајс од Скопје за рушење на дел од објектите на улицата Пиринска број 43 и 45“, соопшти вчера антикорупциската.

НЕМ НАБЉУДУВАЧ НА ГРАБЕЖОТ

Комисијата го темели своето сомневање на пресудата на Врховниот суд од 2002 година со која се укинува одобрението за градење на овие објекти. Јавното правобранителство и во овој, како и во случајот „Бачило“, не вложило жалба ни какво било редовно или вонредно правно средство против пресудата на скопскиот Основен суд 1, со која државата била задолжена да му плати отштета од 51.571.524 денари плус камата.

Антикорупциската комисија објаснува дека заменик-јавниот правобранител на главната расправа одржана 14 јули 2004 година не покажал никаква активност и не предложил никакво дејство за утврдување на фактичката состојба и за оспорување на тужбеното барање. На овој начин тој ја злоупотребил службената положба и не ја извршил службената должност. Тој бил само обичен нем набљудувач на неоснованото одлевање на државните буџетски пари, што бил должен да ги штити. Ни во судската постапка пред првостепениот суд – се вели понатаму во соопштението – не биле направени потребните напори за утврдување на фактичката положба, за целосно и објективно утврдување на сите факти за настанот и за висината на штетата.

Освен едно недоволно критички оценето вештачење не е изведен и утврден ниту еден друг доказ. И министерството за транспорт и врски не презело никакви мерки да спречи настанување имотната штета на државниот буџет иако на крајот на ноември 2005 година, пред исплатата на средствата, било запознаено со текот и нерегуларностите на судската постапка и за пресудата на Врховниот суд.

Исплатата на досудената штета била извршена на сметката на адвокатот Славко Секулов, а не на фирмата на Палевски.

ОДГОВОРНОСТ ЗА ПРАВОБРАНИТЕЛОТ

Државната комисија поднела иницијатива до Јавното обвинителство да поведе постапка за казнено гонење на инволвираните од Јавното правобранителство и во Министерството за транспорт и врски, како и на сите инволвирани од фирмата „УПА Ентерпрајс“, адвокатот-полномошник на фирмата во предметот. Комисијата смета дека сториле злоупотреба на службената положба и овластување, даночно затајување и оштетување и повластување на доверители, со кои е предизвикана штета од големи размери на државниот буџет. Комисијата ќе поднесе иницијатива и до Владата да поведе постапка за утврдување на одговорност на Јавниот правобранител на Македонија, поради „несовесно, неодговорно и непрофесионално постапување во извршувањето на законските обврски за заштита на имотните права и интереси на Република Македонија“, бидејќи покрај крајниот инертен однос во постапката, не поднел жалба ни друго правно средство против пресудата на Основниот суд Скопје 1 од Скопје.

Антикорупциската комисија до Јавното правобранителство ќе поднесе иницијатива за обнова на постапката за овој предмет и да се предложат привремени мерки за заплена и забрана за отуѓување и располагање со имотот на фирмата на Палевски и сметката и имотот на неговиот полномошник адвокатот Славко Секуловски. Предметот ќе биде доставен и до Врховниот суд и до Републичкиот судски за да се испита одговорноста на судиите кои постапувале по предметите за надомест на штета и за извршување на пресудата.

(Н.Н.С.-И.К.И)