Свет
„Палас" во Охрид трето лето под клуч
![](https://makfax.com.mk/wp-content/uploads/2016/11/84ecf311-70b5-4927-b9ad-012708efc02e-1451.jpeg)
Хотелот „Палас", заштитниот знак на туризмот во Охрид, изграден 1957 година, веќе трето лето е затворен
Вработените обвинуваат дека приватизацијата го уништила објектот
Симон Илиевски
ОХРИд – Хотелот „Палас", заштитниот знак на туризмот во Охрид, изграден 1957 година, веќе трето лето е затворен. Љубопитните, пред сж постари туристи, прашуваат што станува со хотелот од нивната младост. Ограден, без осветление, наместо да го разубавува, сега го морничави најубавиот дел од центарот на Охрид. Новите сопственици велат дека хотелот „Палас" не се реновира поради нерешени имотноправни односи, а никој од државните институции и локалната власт не реагира и не ги притиска новите газди да преземат нешто и да го отворат хотелот, зашто спорните 300 квадратни метри што се предмет на денационализација се исклучително мал дел од локацијата и битно не влијаат врз оформувањето и заживувањето на целокупниот простор.
„Во ’Палас‘ ја оставивме младоста и тешко ни е да гледаме као пропаѓа. Наместо гордост на Охрид, сега е ограден и претставува црна и неосветлена зграда од која човек може само да се срами", велат поранешни и сегашни вработени во најголемата угостителско-туристичка компанија „Охрид турист". За нив вината за ваквата состојба ја носат новите сопственици кои по процесот на приватизација го имаат управувачкиот пакет. Тие ветиле дека ќе инвестираат и дека ќе продолжат да работат во многу поубаво уреден хотел, како дел од најпознатите хотелски системи во светот. Незадоволните минатата недела протестираа пред затворен хотел со обвинување новите сопственици го купиле „Охрид турист" не за да ги заживеат хотелите, рестораните и камповите, туку да ги даваат под кирија или да ги продадат за да остварат високи посреднички профити.
Вкупниот капитал на „Охрид турист" заедно со хотелот „Палас" во приватизациската постапка беше проценет на 6,5 милиони евра. А со откуп на акциите управувачкиот пакет го имаат „Екстра скопско", групацијата М6, „Црвена звезда" од Кичево и „Риа" од Охрид. По преземањето во 2001 година, новите сопственици речиси целиот имот го дадоа под закуп, не обезбедија развој на компанијата и, како што велат од Независниот синдикат, не можат да ги обезбедат ниту платите кои во времето на приватизацијата се движеле од 15.000 денари нагоре, а сега од шест до 15 илјади.
Угостителско-туристичката компанија „Охрид турист" ги поседува најатрактивните локации и објекти на брегот на Охридското Езеро. Во нејзина сопственост се хотелите „Палас", „Орце Николов", „Славија" и „Десарет", автокамповите „Андон Дуков" и „Љубаништа", комплексот „Летница" во центарот на Охрид и рестораните „Билјанини Извори" и островот во Св. Наум. Речиси сите се дадени под закуп, освен автокампот „Љубаништа" и рестораните кај Билјанините Извори и Св. Наум, но очигледно дека тоа не е доволно заедно со закупнините да им се исплатат платите на околу 110 вработени во фирмата.
„’Охрид турист’ покажуваше загуби и пред доаѓањето на новите сопственици во 2001 година. Почнавме со загуба од 50 милиони денари, во 2002 имавме девет милиони, следната 23 милиони, во 2004, 41 милион денари, а првата половина на годинава ја завршивме со четири милиони денари загуба", објаснува извршниот директор Милчо Секулоски. На прашањето како може да се случи, покрај високите закупнини за ексклузивните објекти, да се работи со загуба, од менаџментот на компанијата рекоа дека тоа е точно и дека можат да го потврдат и овластените ревизори.
Причина за ваквата тешка состојба во „Охрид турист" како што неофицијално се дознава се несогласувањата меѓу новите акционери и наедно сопственици и нерасчистените сметки уште во процесот на приватизацијата. Познавачи на приликите велат дека тие со купувањето на фирмата наводно сакале да спечалат од рентирање и препродавање наместо да направат концепт за да печалат од туризмот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Регион
Турист пронајден мртов во Грција
![](https://makfax.com.mk/wp-content/uploads/2023/08/grcija-plaza.jpg)
Американски турист (55) денес бил пронајден мртов на грчкиот остров Матраки.
Раниот топлотен бран се совпадна со бранот на исчезнувања и смртни случаи на туристи.
„Постои заедничко нешто. Туристите кои починаа планинареа на високи температури“, изјави за Ројтерс, Петрос Василакис, портпарол на полицијата во Јужното Егејско Море.
Телото на британскиот ТВ водител Мајкл Мозли беше пронајдено на 9 јуни на островот Сими по четиридневна операција за пребарување со помош на авиони и дронови. Мозли наводно одел сам на високите температури пред да исчезне.
Полицијата не го откри идентитетот на Американецот чие тело во неделата беше пронајдено во близина на плажата во Матраки.
– Телото е префрлено на Крф каде ќе биде извршена обдукција – изјави полициски претставник за Ројтерс.
Друг турист, Холанѓанец, кој имаше 74 години, беше пронајден мртов на островот Самос во саботата, додека двајца планинари беа пронајдени безживотни на Крит на 5 јуни.
Спасувачките екипи трагаат по две постари Французинки на Сикинос и по американски полицаец (59) на Аморгос.
– Во тек се две операции за пребарување на други острови. Распоредени се спасувачки екипи и доброволци кои со помош на дрон и куче спасувач трагаат по исчезнати лица – изјави Василакис.
Свет
Хаос на летот од Мароко до Лондон: Авионот принудно слета поради масовна тепачка меѓу патниците
![](https://makfax.com.mk/wp-content/uploads/2023/05/avion.jpg)
На летот на ирската нискобуџетна авиокомпанија „Рајанер“ од Агадир, Мароко до Лондон, избила масовна тепачка меѓу патниците, поради што пилотот принудно слетал, објави „Њујорк пост“.
Весникот наведува дека инцидентот кој се случил на 3 јули почнал уште пред полетувањето кога еден од патниците побарал да го смени седиштето.
Тепачката избила на летот за лондонскиот аеродром Станстед, а патниците врескале еден кон друг додека персоналот на авиокомпанијата давал се од себе за да ги смири.
„Беше толку стресно. Тоа беше како пекол. И се ескалира кога еден човек сакаше да го смени седиштето“, раскажа патник на летот.
Свет
Во Киев е прогласен ден на жалост
![](https://makfax.com.mk/wp-content/uploads/2024/07/Screenshot-2024-07-08-160716.jpg)
Градоначалникот на Киев, Виталиј Кличко, го прогласи 9 јули за ден на жалост по смртоносните напади на главниот град.
Сите знамиња ќе бидат спуштени на половина копје на институционалните згради низ градот, објави тој на Телеграм, а сите забавни настани се откажани.
Најмалку 20 луѓе загинаа во главниот град, вели Кличко, а речиси 100 се ранети.