Членовите на Светиот архијерејски синод на вчерашната седница не го поставија прашањето за одговорност за продажбата на 17 илјади квадратни метри црковен имот во скопско Говрлево за 200 илјади евра на скопска цементарница „Усје".

Рокади во Повардарската и во Брегалничката епархија

Членовите на Светиот архијерејски синод на вчерашната седница не го поставија прашањето за одговорност за продажбата на 17 илјади квадратни метри црковен имот во скопско Говрлево за 200 илјади евра на скопска цементарница „Усје". Поглаварот на МПЦ, г.г. Стефан, вчера само реферирал за Говрлево, претставувајќи го пред членовите на Синодот, но ниту владиката Петар, кој најмногу реагираше за случајот, а ни другите членови не побарале одговорност за договорот за кој не бил известен Синодот, а наводно го потпишал секретарот на Скопската епархија.

Портпаролот на МПЦ, Тимотеј, вчера потврди дека сите преговори и разговори за Говрлево се повлечени. „Членовите на Синодот беа информирани од прва рака од архиепископот Стефан за Говрлево, а од митрополитот Кирил слушнаа и за дислокација на болницата од манастирскиот комплекс „Св. Атанасиј". Но, бидејќи тоа прашање е од делокруг на Архиепископскиот управен одбор, Синодот само стави забелешка да се внимава кога се донесуваат такви одлуки или да се подготви локалното население за да не се намали угледот на МПЦ", изјави вчера порптаролот на МПЦ, Тимотеј, по завршувањето на синодската седница.

Според него, прашањето за одговорност никој не го спомнал на вчерашната седница. А што се однесува до евентуалната одговорност на секретарот на Скопската епархија, портпаролот Тимотеј одговори дека за тоа не е надлежен Синодот.

Синодот на вчерашната седница го разрешил митрополитот дебарско-кичевски Тимотеј од местото администратор на Повардарската епархија, а на негово место го постави брегалничкиот митрополит Агатангел, кој новата должност ќе ја извршува од октомври. Синодот одлучил на местото на Агатангел, за митрополит на Брегалничката епархија да дојде епископот Иларион, кој би требало да се устоличи во текот на ноември. На седницата се спомнала и можноста за нови членови на Синодот, но засега нема конкретна одлука. Синодот го разрешил и в.д. секретарот Ратомир Гроздановски, кој досега бил ангажиран хонорарно. На негово место е назначен епископот Климент.

Синодот вчера одредил и термини за интронизација на двајцата избрани митрополити и тоа за Американско-канадската епархија, г. Методиј, а за Европската епархија, Пимен. Термините се закажани за првата недела во септември во Канада, 12 ноември во Малме и октомври во Велес и во Штип.

На седницата било спомнато и прашањето за преговорите со СПЦ, но МПЦ нема став за продолжување на преговорите. (Ж.Ѓ.)