Владејачките партии место да предвидат законска обврска за јавните функционери при изборот и на заминување на Интернет да ја објават имотната состојба, го користат тоа за да глумат транспарентност

АНКЕТНИТЕ ЛИСТОВИ ЗА ИМОТИТЕ САМО ШМИНКА

Владејачките партии место да предвидат законска обврска за јавните функционери при изборот и на заминување на Интернет да ја објават имотната состојба, го користат тоа за да глумат транспарентност

Само еден функционер е казнет за последните четири години од спроведувањето на Законот за спречување на корупцијата поради прикривање на имотната состојба во анкетните листови. Овој е единствен случај во кој е докажано дека Стојмир Петров, директор на ООЗТ Институти при Медицинскиот факултет, не го пријавил целиот имот во анкетниот лист. Тој бил еден од над триесет предмети што Државната комисија за спречување на корупцијата ги покренала врз основа на индикации дека некои анкетни листови се нецелосни. Надлежните финансиски институции и судот утврдиле дека директорот свесно го прикривал имотот и поради тоа му е изречена казна во висина од 200 илјади евра.

Претседателот на Комисијата за спречување на корупцијата Михајло Маневски вели дека е симболичен успехот на целиот систем надлежен за борбата против корупцијата, но потенцира дека е многу важен, бидејќи институциите веќе го имаат првото искуство како изгледа да се открие прикриен имот од функционер. "Досега поднесовме 30-тина предмети во Управата за јавни приходи заради проверување на веродостојноста на податоците што функционерите ги изнесуваат во анкетните листови, но одговор добивме само за помалку од десет случаи", тврди претседателот Маневски. Тој се жали дека постапката на проверување на листовите во УЈП е многу бавна. "Процесот на проверка на еден анкетен лист трае и повеќе од една година што се покажува како многу неефикасно", вели Маневски.

Според него, во УЈП постојано се правдале дека немаат ни кадровски ниту технички услови за забрзување на постапката. "Велат дека немаат база на податоци и поради тоа за секој анкетен лист морале да извршат увид на самото место", објаснува Маневски.

Додека институциите бележат симболични резултати од контролата на обврската на функционерите да го пријават имотот, политичките гарнитури на секои четири години прават фешта со јавното пријавување на анкетните листови. Иако немаат законска обврска јавно да го објават она што го пријавиле во листовите, политичарите секој по своја волја се решаваат на таков чекор во обид да глумат транспарентност. Експертите и овој пат потсетуваат дека вистинското решение е Владата да внесе одредба во Законот за антикорупција, со која објавувањето на имотот ќе стане законска обврска, а не прашање што зависи од политичката волја на функционерите, кои секогаш на почеток на мандатот мавтаат пред јавноста со анкетните листови, а потоа забораваат на отчетот пред јавноста.

Професорот Владо Камбовски вели дека е добро функционерите да ја објават имотната состојба на Интернет. "Тоа што досега не е решено ова прашање е одраз на политичка волја на партиите", смета професорот Камбовски.

Поранешните влади на премиерот Бранко Црвенковски во 2002 година и на Владо Бучковски анкетните листови ги објавија пред телевизиските камери.

Слична атмосфера се репризира и со новата влада во формирање на мандатарот Никола Груевски, која само еден ден пред да се изгласа во Парламентот, колективно и помпезно ќе ги објави анкетните листови на кандидатите за министри и на пратениците. Новата постава ветува конкретни мерки во борбата против корупцијата, но нема кој да објасни како и кога ќе ја спроведат нивната замисла. За тоа не сака да зборува ниту кандидатот за министер за правда Михајло Маневски. "За наредните проекти ќе разговараме по изборот на владата", вели тој.

Во програмата за работата на Владата мандатарот Груевски навел дека за намалување на корупцијата, меѓу другото, ќе формира и единствена независна агенција, која ќе се занимава со верификување на анкетните листови на јавните функционери, како и веродостојноста на исказите за конфликт на интереси.

Професорот Владо Камбовски ја поздравува идејата на новата влада да се формира Агенција за борба против организираниот криминал и корупција, бидејќи тоа е во согласност со препораките на ЕУ. Но, Камбовски не поддржува агенција само за анкетни листови. "Агенцијата за борба против корупцијата може да ја покрие и проверката на анкетните листови, а не да се формира нова агенција само за нив", вели Камбовски.

Идејата да се формира посебна агенција за анкетни листови не ја поддржува ниту Драган Малиновски, член на Антикорупциската комисија. "Тоа е дирекно мешање во надлежностите на Комисијата. Решението лежи во зајакнување на капацитетите на Антикорупциската комисија", смета Малиновски.

Денес ќе се проверува загадувањето од Цементарницата "Усје"

Еколошките инспектори на Министерството за животна средина и просторно планирање и претставници од Општина Кисела Вода денес ќе прават увид во производството на Цементарницата "Усје", откако жителите што живеат околу Цементарницата минатата недела реагираа дека смрди на изгорена гума и кисела зелка. Луѓето од овој дел на Скопје се жалат дека миризбата се шири наутро од два до пет часот, и дека во воздухот имало бели кристали, кои се таложеле на нивните автомобили и куќи.

Дарко Блинков, еколошки инспектор при Министерството за животна средина и просторно планирање, вели дека денес со преставници од Општина Кисела Вода, која бараше испитување на случајот, заедно ќе извршат увид во документацијата и технолошкиот процес на Цементарницата. Тој објаснува дека тие веќе извршиле увид на загадувачките материи што се испуштаат од "Усје" и од АД"Охис", но дека загадувачките материи биле во рамки на максимално дозволените граници.

"Печењето и миризбата на сулфур на што се жалат жителите може да доаѓа и од гумите, но тоа треба детално да го испитаме. За миризбата на пестициди на која се жалеа жителите во околината на ‘Охис’, најверојатно дошла од тоа што во погонот за пестициди на ‘Охис’ се вршат подготовки за отпочнување на технолошки процес, па при топло време, кога немаше ни ветар, можно е мирисите посилно да се чувствуваат", вели инспекторот Блинков.

Тој објаснува дека погонот за пестициди на АД"Охис" не работи од 28 јули до 28 август, кога оваа компанија треба да направи мерења на загадувачките материи што ги испушта. "Наредено им е да направат мерења кога ќе почнат со работа, а нашиот Инспекторат постојано ќе ја следи состојбата", вели Блинков.