Најзвучните имиња од правосудството, кандидати за јавни обвинители, вчера на последниот ден од конкурсот, по препорачана пошта ги испраќале своите кандидатури до Собранието.

КОЈ ЌЕ СЕДНЕ ВО ФОТЕЛЈАТА НА ПРЧЕВСКИ?

Мери Јордановска

Најзвучните имиња од правосудството, кандидати за јавни обвинители, вчера на последниот ден од конкурсот, по препорачана пошта ги испраќале своите кандидатури до Собранието. Најдоцна до утре ќе се знае кои се кандидатите кои влегуваат во битка за фотелјата во Државното јавно обвинителство. Од Владата информираат дека за петнаесетина дена Македонија ќе добие нов јавен обвинител што ќе го замени Александар Прчевски.

Најзвучните имиња на кандидатите што вчера по препорачана пошта или директно во архивата ги испраќале своите кандидатури, засега се држат во најстрога тајност, а доброупатени извори за „Време“ тврдат дека имињата ќе бидат големо изненадување за јавноста. Од сите лица за кои досега се шпекулираше дека ќе се кандидираат за фотелјата во јавното обвинителство, на конкурсот не се јавил ниту еден од нив. Адвокатот Александар Тортевски вели дека не сакал да конкурира, а да не биде избран. На конкурсот не се јавил Тодор Витларов, вишиот обвинител од Штип, со чие име се шпекулираше во јавноста, ниту пак в.д. претседателката на Државната комисија за спречување на корупцијата, Слаѓана Тасева.

Засега, познато е дека кандидати за јавен обвинител се адвокатот Ванчо Митев, актуелниот заменик-јавен обвинител Коста Петровски и Борис Димзов, правник од Охрид. Претседателот на комисијата за избори и именувања Трајко Велјановски вчера не беше достапен да каже уште колку нови кандидатури пристигнале до Собранието.

За правниците се симптоматични трите имиња кои досега се јавиле на конкурсот, со оглед на тоа што не и се многу познати на јавноста. Освен тоа, изненадувачки е мал интересот на правниците да конкурираат за позицијата јавен обвинител. Од овие причини, во оптег се две варијанти, тврдат нашите извори.

– Едната варијанта е на конкурсот во последен момент да истрчаат звучни имиња, па Владата да предложи едно од нив. Другата опција што не се исклучува е да не се избере ниту еден од пријавените кандидати, по што конкурсот ќе се повтори уште еднаш – тврдат експертите.

Сепак, од Владата се оптимисти дека собраниската комисија во текот на наредната недела ќе ги испрати кандидатурите до Владата, која ќе предложи до парламентот еден од кандидатите. Претставници од Владата се надеваат дека најдоцна до 20 јануари Собранието ќе го избере новиот јавен обвинител.

Зошто толку мал интерес на конкурсот за избор на една од најважните државни функции? Експертите се едногласни дека јавниот обвинител во наредниве години ќе биде една од клучните фигури во државава, па токму затоа кај правниците постои страв.

– Владата беше подготвена да дава по 200.000 евра годишно за странец во фотелјата на јавен обвинител, а сега, кога обвинител треба да стане македонски државјанин ќе дава само по 40.000 денари месечно. Тоа и не е некој мотив за работа. Освен тоа, оној што ќе седне во обвинителската фотелја треба да има јака „кичма“ оти „Бачило“ беше само почеток. Ќе има уште илјадници предмети, меѓу кои и хашките случаи. Финалето е во обвинителството и таму треба да застане подготвен човек. Очигледно, во Македонија нема многу такви – тврдат експертите.

Како пример за ова тие ја наведуваат Хрватска, во времето кога политичката ситуација била слична на оваа во Македонија.

– Тогашниот хрватски јавен обвинител, поради притисоците и во спалната соба имаше обезбедување – велат нашите извори.

Со оглед на тоа што конкурсот официјално се затвори вчера, ќе се остави простор до петок да стигнат сите кандидатури за местото јавен обвинител испратени по препорачана пошта.