Во Македонија за корупција не се сметаат подароци во вредност од пола просечна плата, а во Хрватска, каде просечната плата е 550 евра, најскапите дозволени подароци за службениците се 65 евра

ЗАКОН ЗА СПРЕЧУВАЊЕ КОНФЛИКТ НА ИНТЕРЕСИ

Во Македонија за корупција не се сметаат подароци во вредност од пола просечна плата, а во Хрватска, каде просечната плата е 550 евра, најскапите дозволени подароци за службениците се 65 евра

Државните службеници и во иднина ќе продолжат да примат подароци од граѓаните во знак на благодарност за добро завршена услуга, без да стравуваат дека некој ќе ги обвини за корупција. Досегашната пракса, кога на луѓето од другата страна на шалтерите им се носеше кафе, виски, но и девизи за да ни завршат побрзо некоја работа, сега веќе категорично се забранува со закон. Меѓутоа, останува можноста да им носиме пригодни подароци, како што се книги или сувенири и слични предмети, кои не ја надминуваат вредноста од 100 евра. Преведено на јазикот на стандардот на обичниот граѓанин, тоа е половина просечна македонска плата. Висината на наградата за службениците е поголема од минимална плата што се исплаќа во Македонија.

Можноста за примање пригодни подароци на службениците од граѓаните е предвидено во Предлог-законот за спречување на судир на интереси, кој го подготви Министерството за правда и го достави во Собранието за донесување.

Од ресорното министерство не сакат да коментираат дали најскапиот подарок од 100 евра што може да го прими службеник е многу висок за македонските услови. Велат дека кога ја утврдиле висината на подарокот, како репер не ја зеле просечната плата во Македонија. "Вредноста на подарокот може да биде и 30 и 50, не мора да е 100 евра", се правдаат изворите од Правда. Според нив, никој од учесниците на јавната расправа, која траеше скоро една година, ни по трибините и семинарите, а ниту во собраниската расправа кога се утврдувала потребата за донесување на законот, не побарал намалување на вредноста на подароците.

При утврдување на висината на подароците од ресорното министерство се воделе од искуството на другите земји, како што се Црна Гора, Хрватска, Германија.

Хрватското искуство говори нешто друго. Нивната просечна плата е над 500 евра, а хрватските службеници смеат да примат подароци најмногу до 500 куни или нешто над 60 евра. Ова значи дека во Хрватска висината на подарокот е помала од Македонија, ако се има предвид дека нашата просечната плата е 200 евра, а највисокиот лимит на подарокот е 100 евра.

Црногорскиот закон за спречување на судир на интереси по прашањето на подароците е уште порестриктивен. Нивните службеници не смеат да примат скапи подароци. Во случај да ги добијат, мора да ги пријават и тие стануваат сопственост на државата.

Интересно е што во законодавството на овие две бивши југословенски држави, во делот што го регулира конфликтот на интереси се потенцира фактот дека вредноста на подарокот треба да се пресметува според пазарна цена која ја утврдува посебна комисија, додека во нашиот закон тоа го нема.