Израел не се согласил на прекин на огнот ниту на договор со Хамас за ослободување на затвореници, изјави денес израелскиот премиер Бенјамин Нетанјаху, пред очекуваното ослободување на израелско-американскиот заложник Едан Александар.

Извор запознаен со ситуацијата изјави дека ослободувањето на Александар, последниот преживеан заложник со двојно американско државјанство, држен во Газа, се очекува денес, еден ден откако Израел беше информиран за одлуката на Хамас да го стори тоа како гест на добра волја кон претседателот Доналд Трамп.

Ослободувањето, по четиристраните разговори меѓу Хамас, САД, Египет и Катар, би можело да го отвори патот за ослободување на преостанатите 59 заложници што сè уште се држат во Газа.

Но, Нетанјаху рече дека Израел се согласил само да дозволи безбеден премин за Александар и дека неговите сили ќе продолжат со неодамна објавените подготовки за засилување на операциите во Газа.

„Преговорите ќе продолжат под притисок, како подготовка за интензивирање на борбите“, соопшти неговиот кабинет, додавајќи дека воениот притисок го принудил Хамас да го направи ослободувањето.

Неочекуваната вест за разговорите меѓу Хамас и САД дојде непосредно пред закажаното заминување на Трамп во посета на Персискиот Залив, која не вклучува посета на Израел.

Вчера, Хамас соопшти дека разговарал со САД и се согласил да го ослободи Александар, потег што клучните арапски посредници Катар и Египет го нарекоа охрабрувачки чекор кон враќање на преговорите за прекин на огнот во воено разурнатата енклава.

Во соопштението, семејството на Александар им се заблагодари на Трамп и на неговиот специјален пратеник Стив Виткоф, велејќи дека се надеваат дека одлуката ќе го отвори патот за ослободување на преостанатите заложници, од кои се верува дека само 21 е жив. „Апелираме до израелската влада и преговарачките тимови: ве молам не запирајте“, додаде семејството.

Воените шефови на Индија и Пакистан денес ќе разговараат за следните чекори по прекинот на огнот со кој се врати мирот на границата среде најжестоките борби меѓу нуклеарно вооружените соседи во речиси три децении.

Немаше извештаи за експлозии или проектили во текот на ноќта, по првичните прекршувања на прекинот на огнот, а индиската војска соопшти дека неделата била првата мирна ноќ по деновите долж границата, иако некои училишта останале затворени.

Прекинот на огнот во хималајскиот регион во саботата, објавен од американскиот претседател Доналд Трамп, следеше по четири дена интензивна огнена престрелка, дипломатија и притисок од Вашингтон.

Индиската војска во неделата испрати порака до Пакистан за прекршувањата на прекинот на огнот од претходниот ден, што укажува на намерата на Њу Делхи да одговори на понатамошни вакви инциденти, изјави висок индиски воен офицер.

Портпаролот на пакистанската војска негираше дека е прекршено примирјето.

Во соопштението објавено во саботата, индиското Министерство за надворешни работи соопшти дека командантите на двете страни ќе одржат меѓусебни разговори во понеделник.

Двете земји, традиционални соперници, ги напаѓаа меѓусебните воени инсталации со ракети и беспилотни летала, при што загинаа десетици цивили, додека односите се влошија откако Индија го обвини Пакистан за нападот во кој загинаа 26 туристи.

Пакистан ги негира обвинувањата и повикува на неутрална истрага.

Индија во средата соопшти дека започнала напади врз девет „терористички инфраструктурни“ локации во Пакистан и пакистански Кашмир, за кои Исламабад тврди дека се цивилни локации.

Иако Исламабад му се заблагодари на Вашингтон за олеснувањето на прекинот на огнот и ја поздрави понудата на Трамп да посредува во спорот со Индија околу Кашмир, Њу Делхи не коментираше за учеството на САД во прекинот на огнот или разговорите на неутрално место.

Њу Делхи, кој тврди дека споровите со Пакистан мора да ги решаваат директно соседите, ја отфрли можноста за вмешаност на која било трета страна.

Индија, со хиндуистичко мнозинство, и муслимански Пакистан владеат со дел од хималајскиот регион Кашмир, но го бараат во целост.

САД и Кина ги завршија дводневните трговски разговори во Женева со позитивен исход, најавувајќи заедничка изјава што ќе биде објавена подоцна во текот на денот. Американските претставници го истакнаа постигнувањето договор што ќе го намали трговскиот дефицит на САД, додека кинеските претставници изјавија дека страните постигнале важен консензус и се согласиле да започнат нов форум за економски дијалог.

По завршувањето на преговорите, ниту една страна не објави никакви детали. Кинескиот вицепремиер Хе Лифенг изјави дека заедничка изјава ќе биде објавена во Женева во понеделник. Заменик-министерот за трговија Ли Ченгганг рече дека тоа ќе содржи „добри вести за светот“.

Кога беше прашан за точниот момент на објавување на заедничката изјава во понеделник, Ли Ченганг, преговарач за меѓународна трговија на Кина и заменик-министер за трговија, одговори со кинеска поговорка: „Ако храната е вкусна, времето за сервирање не е важно“.

„Без разлика кога ќе биде објавена оваа изјава, тоа ќе биде одлична и добра вест за светот“, рече Ли.

Изјавата доаѓа откако високи претставници од двете земји ги опишаа разговорите како конструктивни, со постигнат „важен консензус“ и договор за воспоставување нов механизам за економски дијалог.

Американскиот министер за финансии Скот Бесент и трговскиот претставник Џејмисон Грир ги опишаа разговорите како „продуктивни“ и забележаа „значаен напредок“, додавајќи дека деталите ќе бидат објавени во понеделник.

Во одделни изјави за новинарите, ниту една страна не го спомена договорот за намалување на американските царини од 145% за кинеските стоки или кинеските царини од 125% за американските стоки.

Грир и Бесент не одговорија на прашањата на новинарите. Американскиот секретар за финансии претходно изјави дека овие тарифи претставуваат трговско ембарго меѓу двете најголеми економии во светот и дека тие треба да се „намалат“.