Газди на фирмата „Платина инженеринг“, сопружниците Рокан (49) и Маријана

(49) Атанасоски, вчера беа осудени на вкупно 15 години затвор, а сопственикот

на „Асиба МГ“, Пеце Дамевски (53), доби петгодишна затворска казна за перење на

500.000 евра преку Комерцијална банка.

ПРЕСУДА ЗА ПЕРЕЊЕ ПАРИ ПРЕКУ

КОМЕРЦИЈАЛНА БАНКА

Газди на фирмата „Платина инженеринг“, сопружниците Рокан (49) и Маријана

(49) Атанасоски, вчера беа осудени на вкупно 15 години затвор, а сопственикот

на „Асиба МГ“, Пеце Дамевски (53), доби петгодишна затворска казна за перење на

500.000 евра преку Комерцијална банка. Дамевски е единствениот што беше

притворен за големата афера што беше откриена во јануари годинава и тој вчера

мирно ја прифати пресудата. Другите обвинети се во бегство и по нив е распишана

потерница. За овој случај вчера беше осудена и Рената Посавац, директор во

„Платина инженеринг“, која доби 6 години затвор за перење пари. Обвинетите

солидарно треба да ги вратат 514.360 евра што претставниците на Комерцијална

банка ги побараа како отштета. Маријана Атанасоска доби 8 години затвор, а

нејзиниот сопруг беше осуден на седумгодишна затворска казна за злоупотреба на

службената должност и за перење пари.

Во јануари годинава Одделението за економски криминал на СВР Скопје поднесе

пријава, по што Одделението за организиран криминал во Обвинителството подигна

обвинение против осомничените. На сопружниците, познати по аферата со станови

на наивната фирма „Платина инженеринг“, им се судеше во отсуство и се

претпоставува дека тие се избегани во странство.

Според обвинението, Маријана Атанасоска, која работела како одговорно лице во

Секторот за односи со странство, со овластувања од прва категорија за

надворешен промет на Комерцијална банка, во два наврата ја злоупотребила

службената положба.

Таа без налог и без покритие извршила плаќање по дознака по претходно отворени

акредитиви на две странски фирми во вкупен износ од 514.250 евра. За фирмата

Тајонеџ холдинг лимитед Нѕцосиа-Цѕпрус таа извршила плаќање во износ од 157.250

евра, а за фирмата на Дамевски, ДИН ДОО „Оточец“, Словенија, 357.000 евра.

Целата финансиска „операција“ била поттикната од Рокан. На брачната двојка и’

требале пари, а претходно настанале компликации околу банкарска гаранција за

добивање кредит. Поради тоа Рокан ја поттикнал сопругата да му предложи на

Дамевски дали некоја банка од Словенија или од Австрија може да изврши откуп на

акредитив, што таа би го отворила.

По ова Дамевски заминал во Словенија и од Нова Љубљанска банка (НЛБ) добил

информација дека во рок од 10 до 15 дена може да се откупи акредитивот, за кој

требало да се склучат договори откако коресподентската банка ќе го испратела

свифтот за акредитивот.

По ова, Маријана отворила акредитив на веќе постоен број на акредитив на

налогодавецот „Тиквеш Винарска визба“ АД Скопје, наменет за друг корисник,

вметнувајќи ја фирмата на Дамевски како корисник на акредитивот на износ од

357.000 евра, со ознака дека е платено во НЛБ-Љубљана.

Во акредитивот таа се повикала на профактура, наводно издадена од фирмата ДИН

ДОО „Оточец“ за фирмата „Тиквеш“, со што била задолжена сметката на Комерцијална.

Откако Атанасоска го доставила свифтот за отворениот акредитив од страна на

наводниот налогодавец „Тиквеш“ во корист на фирмата ДИН ДОО „Оточец“, Дамевски

бил известен од НЛБ-Љубљана дека акредитивот е отворен и дека парите се

пристигнати. По склучувањето договор за откуп на акредитивот од страна на

банката, парите веднаш биле префрлени на сметката на фирмата ДИН ДОО „Оточец“.

Во истрагата е утврдено дека од вкупната сума на сметката на „Платина

инженеринг“, Дамевски префрлил 97.921 евро, потоа по негов налог 50.000 евра на

име банкарска гаранција биле префрлени на фирма во Германија, а пак 60.000 евра

како банкарска гаранција на сметка во Лондон. Остатокот од парите, околу 50.000

евра, Дамевски ги извадил од сметката на својата фирма на име материјални

трошоци и тие пари му ги дал на Рокан Атанасоски при нивната средба во Загреб,

задржувајќи провизија од 8 отсто од севкупната сума на акредитивот.