Турскиот претседател Реџеп Таип Ердоган денеска ги обвини опозициските партии за поттикнување ксенофобија и расизам, еден ден откако жителите на населба во централна Турција запалија продавници во сопственост на Сиријци.

Во телевизиско обраќање, Ердоган ги обвини опозициските партии, кои се залагаа за репатријација на бегалците, дека поттикнуваат насилство.

„Ништо не може да се постигне со поттикнување ксенофобија и омраза кон бегалците“, рече Ердоган, пренесе АП.

Обилните дождови предизвикаа поплави во источниот дел на Чешка, соопштија службите за вонредни состојби.

Во Злин, индустриски град на околу 250 километри југоисточно од Прага, во близина на границата со Словачка, имаше повеќе од 300 интервенции.

Се користат пумпи за сушење на подрумите и приземјето на зградите, а службите ги отстрануваат и паднатите дрвја од коловозите.

На улиците на селото Сажовице западно од Злин водата се искачи и до еден метар. Десетина луѓе мораа да бидат евакуирани од своите домови.

Во Рачкова, село северно од Злин, повеќе од 40 згради беа поплавени, вклучувајќи општински канцеларии и училиште.

Потоците на места се претворени во реки. Штетата се мери во милиони евра.

Повеќе од 300 луѓе се хоспитализирани, а многу други страдаат од дијареа, гадење, грчеви или треска по појава на норовирус во општината Тори дел Бенако на езерото Гарда во северна Италија, соопштија денеска властите.

Повеќе од 900 случаи се регистрирани во таа општина на источниот брег на езерото, инаку популарна дестинација за одмор за Италијанците, но и за странските посетители. Се претпоставува дека вирусот се шири преку водата за пиење од чешмата.

Општинските власти им наложија на луѓето да купат флаширана вода, а чистата вода се дели бесплатно.

Италијанските медиуми соопштија дека се верува дека избувнувањето на вирусот е поврзано со високите нивоа на езерата по обилните дождови во последните недели, кои го преплавија канализациониот систем. Засега нема официјална потврда за ова.

Општинските власти соопштија дека се обидуваат да утврдат како се шири вирусот. Додека во петокот беа пронајдени траги во водата за пиење, последователните тестови од добавувачот на вода беа негативни.

Сепак, градоначалникот Стефано Никотра се уште повикува на претпазливост. „Не користете вода од чешма за лична употреба или за храна“, рече тој. Водата не смее да се користи за готвење или миење храна.

Општината вообичаено има само 3.000 постојани жители, но сега прима и многу туристи. Норовирусот е многу заразен, но обично краткотраен.