Двесте железниЧари вЧера запоЧнаа штраЈк со глад

Двесте железниЧари вЧера запоЧнаа штраЈк со глад

Со солзи во очите и без надеж за решавање на проблемот во “Македонски железници”, над 200 вработени вчера почнаа штрајк со глад. Вчера попладне, пак, тројца синдикалци од МЖ беа повикани на информативен разговор во скопската полициска станица “Пролет”, бидејќи раководството на МЖ против нив поднесе пријави за фалсификување исправи, незаконски штрајк, предизвикување материјална штета и за спречување на другите вработени да ги извршат работните задачи.

Владата го оценува штрајкот на железничарите како политичка манипулација пред локалните избори. Вицепремиерот Минчо Јорданов по вчерашната владина седница изјави дека не е исклучена можноста да се отпуштат штрајкувачите и да се отстранат од местата каде што штрајкуваат.

– Целта на штрајкот не е да се реши социјалниот пакет, туку да се направи политички проблем – изјави Јорданов.

Штрајкувачите порачуваат возовите да не се пуштат по секоја цена за да нема несакани последици за безбедноста на сообраќајот.

– Да престанат со закани врз работниците бидејќи ова е анархија. Со продажба на стари вагони раководството собра 3,5 милиони евра, колку што се потребни за исплата на отпремнини за отпуштените – вели Никола Богоевски, претседател на Синдикатот на сообраќајниот персонал.

Железничарите се категорични дека ќе издржат со месеци и, ако треба, ќе ги донесат и своите фамилии.

– Ако треба, овде ќе умреме зашто и онака едвај преживувавме. Раководството зема на душа над 3.000 луѓе, на кои железничарската плата им беше единствен приход во семејството – велат тие.

Штрајкувачите се револтирани од односот на Владата и од притисоците од раководството.

– Со овој подмолен метод директорот Наумов се служеше и во 1997 година. Со полиција и со тргање на страна на синдикалците си ја чува фотелјата – велат железничарите.

Во Владата тврдат дека штрајкот е нелегитимен и дека зад него не стојат легитимни синдикални органи.

– Еден од тие синдикални борци зел кредит од 15.000 евра од МЖ и лесно му е да каже дека треба да се дадат уште по 7.000 евра. Ова не е кванташки пазар – изјави Јорданов.

Тој истакна дека четири синдикати од МЖ ја известиле Владата дека не стојат зад штрајкот, а другите два воопшто не испратиле известување. Јорданов рече дека граѓаните ќе ги плаќаат долговите на железницата од 136 милиони евра. Тој информираше дека од јануари до денеска претпријатието направило загуби од 300 милиони денари.

Во МЖ штрајкуваат вработените чии имиња се на списокот за отпуштање, синдикалците што добија отказ, но и други нивни колеги, кои се плашат да не ги снајде истата судбина. Тие тврдат дека до 2007 година од железница треба да си заминат уште 800 луѓе и се закануваат дека штрајкот нема да прекине додека не се исполни нивното барање за исплата на 150.000 денари за секој отпуштен работник и на максимум 12 плати, како и ревизија на списоците за технолошки вишок.