„Стопанска банка Битола“, „Макстил“, „Комерцијална банка“, „Алкалоид“ и „Фершпед“ се петте домашните компании што ќе платат најмногу данок на добивка за своето успешно работење во првата половина на годинава и кои котираат на Македонската берза.

Никола Стојанов

„Стопанска банка Битола“, „Макстил“, „Комерцијална банка“, „Алкалоид“ и „Фершпед“ се петте домашните компании што ќе платат најмногу данок на добивка за своето успешно работење во првата половина на годинава и кои котираат на Македонската берза. Воедно, првите четири од нив се и најпрофитабилните компании во земјава.

Ова е ранг-листата на најголеми плаќачи на даноци што „Време“ почнувајќи од сега традиционално ќе ја објавува на секои 6 месеци. Ранг-листата е направена врз основа на податоците од шестмесечни неревидирани финансиски извештаи на 27 компании, кои објавиле финансиски извештаи, а чии акции котираат на Македонската берзата за хартии од вредност.

Овие компании на државата ќе и платат 2,3 милиони евра данок на добивка, што е повеќе од 10 отсто од сите пари за данок на добивка што Министерството за финансии планирало да ги собере за првата половина од годинава. На листата на десетте најголеми плаќачи на данок на добивка се и хотелите „Македонија Турист“, потоа „Макошпед“, „Инвест банка“, битолската Фабрика за квасец и веледрогеријата и производител на лекови „Реплек“.

Според анализата на „Време“, заедно со парите за данок на добивка на другите 22 компании чии акции котираат на официјалниот пазар, а кои прикажале добивка, државата за првата половина на годинава ќе собере 3 милиони евра. Ова се 15 отсто од сите 20,9 милиони евра пари за данок на добивка што Министерството за финансии планирало да ги собере од македонските фирми.

Компании со најголем профит

(за првите 6 месеци 2005 година)

1. АЛКАЛОИД СКОПЈЕ 4,1 милиони евра

2. МАКСТИЛ СКОПЈЕ 3,25 милиони евра

3. КОМЕРЦИЈАЛНА БАНКА СКОПЈЕ 3 милиони евра

4. СТОПАНСКА БАНКА БИТОЛА 2,6 милиони евра

5. ФЕРШПЕД СКОПЈЕ 2 милиони евра

6. ОХРИДСКА БАНКА СКОПЈЕ 1,2 милиони евра

7. РЕПЛЕК СКОПЈЕ 0,62 милиони евра

8. ТОПЛИФИКАЦИЈА СКОПЈЕ 0,6 милиони евра

9. МАКОШПЕД СКОПЈЕ 0,44 милиони евра

10. КВАСАРА БИТОЛА 0,4 милиони евра

Најголем плаќачи на данок на добивка

(за првите шест месеци 2005 година))

1. СТОПАНСКА БАНКА БИТОЛА 650.000 евра

2. МАКСТИЛ СКОПЈЕ 570.000 евра

3. КОМЕРЦИЈАЛНА БАНКА СКОПЈЕ 530.000 евра

4. АЛКАЛОИД 319.000 евра

5. ФЕРШПЕД 240000 евра

6. МАКЕДОНИЈА ТУРИСТ СКОПЈЕ 187.000 евра

7. МАКОШПЕД 78.000 евра

8. ИНВЕСТ БАНКА СКОПЈЕ 65.000 евра

9. КВАСАРА БИТОЛА 57.000 евра

10. РЕПЛЕК 49.000 евра

УЈП КАКО ВОЕНА ТАЈНА ГИ ЧУВА ПОДАТОЦИТЕ

Управата за јавни приходи ги крие податоците за тоа која фирма колку плаќа за даноци. Според образложението на Петра Митева, директорката на УЈП законот што ја регулира работата на таа институција не и дозволувал да открива податоци што биле деловна тајна и морала за нивно објавување да бара согласност од фирмата за која се бараат податоци. Митева пред една година во изјавата за „Време“ вети дека во најскоро време ќе побара од пратениците тој член од Законот за работа на УЈП да се избрише. До денеска Митева го нема остварено ветувањето.