Свет
Црвенковски наредил истрага во Агенцијата за разузнавање
Агенцијата за разузнавање (АР) од вчера почнала детална проверка на своите вработени откако „Време“ откри дека во оваа институција бил вработен Екрем Мустафи, поранешен затвореник осуден за фалсификување службени документи.
Емил Зафировски
Агенцијата за разузнавање (АР) од вчера почнала детална проверка на своите вработени откако „Време“ откри дека во оваа институција бил вработен Екрем Мустафи, поранешен затвореник осуден за фалсификување службени документи. Наредбата за проверка на документацијата и на досиејата на вработените ја издал претседателот Бранко Црвенковски под чија надлежност е АР.
Тој побарал од Лазе Китановски, директорот на Агенцијата, целосна информација за случајот „Мустафи“.
– Претседателот писмено побара информации за конкретниот случај од директорот на Агенцијата. Истовремено побара да му бидат доставени информации за сите вработувања во изминатиов период. Проверката на документацијата и на досиејата на вработените веќе е почната – изјави вчера Тања Цветковска, портпаролка на претседателот.
Според извори од Агенцијата за разузнавање, дел од раководните структури во АР знаеле дека инспекторот Екрем Мустафи бил поранешен осуденик. Тие тврдат дека информациите се премолчувале поради партиска директива, а со поддршка на Мухамет Исмаили, заменик-директор на АР и кадар на ДУИ.
Дознаваме дека Мерхиде Мустафи, сопруга на разузнавачот Екрем, била членка на разгранокот на ДУИ во Тетово и блиска пријателка со Шпреса Лика, сопруга на тетовскиот градоначалник Хазби Лика. „Време“ откри дека лицето Екрем Мустафи, кој пред шест месеци бил вработен во агенцијата, е поранешен затвореник осуден за две криминални дела – злоупотреба на службена положба и фалсификување патни документи.
Во Агенцијата за разузнавање владее целосен хаос и не функционира ниту една служба, а веќе почнало и одлевање на старите кадри, тврдат изворите. Тие нагласуваат дека професионалците се потиснати и нефункционални за сметка на нововработените кадри по партиски клуч.
Како пример го наведуваат случајот со заменик-директорот Мухамед Исмаили, кој бил поставен на таа функција со само една и пол година стаж, од која една година како приправник.
– Случајот Мустафи е само еден класичен пример за огромните пропусти и нефункционирање во Агенцијата за разузнавање. А станува збор за институција што според функцијата треба да биде еден од држечките столбови на државата, особено кога Македонија се уште не е застаната на здрави нозе – коментираат изворите од АР.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хезболах лансира ракети врз северен Израел
Хезболах лансира 140 ракети кон северниот дел на Израел, само еден ден откако лидерот на екстремистичката група, Хасан Насрала, најави одмазда за серијата експлозии во Либан во последните три дена.
Израелската армија објави дека ракетите паднале во три брана во петокот попладне, а цел биле места по должината на разурнатата граница со Либан, пренесува „Јутарњи“.
Хезболах соопшти дека цели биле неколку места по должината на границата со ракетите „Катјуша“, вклучително и неколку бази за противвоздушна одбрана, како и штабот на израелската оклопна бригада, која, според нив, била првиот погоден, пренесува „Н1 Загреб“.
Хезболах рече дека ракетите биле како одмазда за израелските напади врз села и домови во јужен Либан.
Свет
Камала Харис: Ако некој упадне во мојот дом, ќе биде застрелан
Потпретседателката на САД, Камала Харис, изјави дека е подготвена да употреби пиштол доколку натрапник упадне во нејзиниот дом.
„Ако некој упадне во мојата куќа, ќе биде застрелан“, рече Харис, гостинка на Опра Винфри.
„Веројатно не требаше да го кажам тоа, но мојот персонал подоцна ќе се справи со тоа“, додаде таа и се насмеа. Харис, која потврди дека поседува пиштол за време на неодамнешната претседателска дебата, ја повтори својата поддршка за забраната на автоматските пушки.
„Огненото оружје од овој тип е буквално дизајнирано да биде воено средство. За него нема место на улиците на граѓанското општество“, нагласи таа.
Рече дека е поддржувач на американскиот втор амандман, кој го штити правото на поседување оружје, но се осврна и на американскиот проблем со престрелките во училиштата.
Таа предупреди дека е вознемирувачко што децата мораат да поминат вежби за да се подготват за вакви инциденти. „Не мора да биде така“, убедена е таа. По едно од најновите масовни престрелки во САД, 14-годишно момче е обвинето за убиство на четири лица во средно училиште во Џорџија.
„Поседувам пиштол веројатно од истата причина како и многумина што го имаат – за лична безбедност. Бев обвинител“, рекла Харис во 2019 година, според Би-би-си.
За време на минатонеделната дебата со републиканскиот кандидат Доналд Трамп таа ги негира обвинувањата на Трамп дека „ќе им го одземе пиштолот на сите“ доколку биде избрана во Белата куќа.
Трамп поседуваше и три пиштоли, но мораше да предаде два од нив и да се соочи со ограничувања за третиот откога беше обвинет.
Регион
Додик: Нема да ја почитувам одлуката на Уставниот суд
Српскиот лидер во Босна и Херцеговина, Милорад Додик, изјави дека нема да ја почитува одлуката на Уставниот суд на таа земја, кој го оспори изборниот закон за ентитетите и покрај тоа што неговата партија ќе учествува на претстојните локални избори, кои се одржуваат според одредбите на друг државен изборен закон.
„Изборниот закон на Република Српска е уставен и овој правен акт ќе се применува“, изјави Додик за Радио-телевизија на Република Српска реагирајќи на вчерашната одлука на Уставниот суд на Босна и Херцеговина.
Тој суд оцени дека со донесувањето на Изборниот закон на Република Српска е прекршен Уставот на Босна и Херцеговина. На овој начин се оспорува улогата на Централната изборна комисија на БиХ, која е задолжена за организирање и спроведување на изборите.
На ваков потег се одлучија откако високиот меѓународен претставник, Кристијан Шмит, наметна измени во Изборниот законик на Босна и Херцеговина.
Сепак, Додик тврди дека само ќе го почитува Изборниот законик за ентитетите бидејќи тој не бил оспорен од Уставниот суд на Република Српска. Но, државниот е.
И покрај приговорите и отфрлањето на одлуките на Уставниот суд на БиХ, кои властите на Република Српска ги нарекуваат скратени затоа што двајца српски судии не учествуваат во неговата работа, партиите на власт од тој ентитет сепак ќе учествуваат на претстојните локални избори организирани од државната Централна изборна комисија.
Овие избори ќе се одржат на 6 октомври, а ќе се изберат нови свикувања на градските и општинските совети и раководители на 141 општина и град.