Турбуленцијата предизвикана од слетувањето на еден поголем авион непосредно пред доаѓањето на патничкиот авион на „Туркиш Ерлајнс“ на амстердамскиот

Турбуленцијата предизвикана од слетувањето на еден поголем авион непосредно пред доаѓањето на патничкиот авион на „Туркиш Ерлајнс“ на амстердамскиот аеродром би можела да биде причината за уривањето.

Здружението на турски пилоти на прес конференција соопшти дека авион од типот Боинг 757 се спуштил на аеродромот Шипхол само две минути пред авионот на турскиот авиопревозник.

Боингот 757 предизвикал силна турбуленција во која што навлегол турскиот патнички авион Боинг 737 – 800, поради што наеднаш ја изгубил височината.

Турскиот патнички авион се урна во средата пред пладне додека се подготвувал да слета на амстердамскиот аеродром Шипхол. Авионот при падот се скрши на три дела. Во несреќата загинаа најмалку десет лица, а повредени се над 80 патници. Меѓу загинатите се и тројцата пилоти на авионот

Здружението на турските пилоти сепак посочи дека нема точна информација за оддалеченоста на двата авиона и за тоа дали турскиот авион бил предупреден за таквата ситуација.

„Но, според извештаите кои што ги видовме, изгледа дека тоа не било споменато“, соопшти Здружението, кое што побара од холандските воздухопловни власти да бидат неутрални и да ги објават сите информации.

И портпаролот на холандскиот безбедносен борд рече дека силната турбуленција е една од можните причини за падот на авионот, која што ја разгледуваат истражителите.

Тој додаде дека се уште не е јасно дали Боингот 757 навистина слетал пред доаѓањето на турскиот авион.

Порпаролката на аеродромот Шипхол одби да ги коментира сите шпекулации за причините за несреќата, се додека трае истрагата.крај/онаса/амп