Според „Фајненшл тајмс“, американскиот претседател Доналд Трамп наводно ја повикал Украина да размисли за напад подлабоко на руска територија и директно го прашал украинскиот претседател Володимир Зеленски дали, доколку добие американско оружје со долг дострел, би можела да ја таргетира Москва.

Весникот се повикува на луѓе запознаени со разговорот меѓу двајцата лидери на 4 јули. Трамп, според изворот, рекол дека „Русите треба да ја почувствуваат болката“, а потоа го прашал Зеленски: „Можете ли да ја погодите Москва? Можете ли да го погодите Санкт Петербург?“

На што, според истиот извор, Зеленски одговорил: „Апсолутно. Можеме ако ни го дадете оружјето“.

„Фајненшл тајмс“ пишува дека овој наводен разговор претставува остар пресврт во претходната позиција на Трамп за војната во Украина и неговите предизборни ветувања за повлекување на САД од странски конфликти.

Во неодамнешното интервју за Ен-би-си, Трамп нагласи дека сака да ѝ испрати на Украина „одбранбено оружје“ што би ѝ помогнало да ги запре нападите врз украинските градови.

Во Европската Унија минатата година, околу 27 проценти од населението на возраст од 16 години и повеќе не можеле да си дозволат една недела годишен одмор далеку од дома, објави денес Евростат.

Канцеларијата на ЕУ задолжена за статистика наведува дека овој удел се намалил за 1,5 процентни поени во споредба со 2023 година и е значително помал, за 10,6 процентни поени, отколку пред десет години, во 2014 година.

Најголем удел од населението кое не можело да си дозволи една недела одмор е забележан во Романија (58,6 проценти), Грција (46) и Бугарија (41,4), пренесува Танјуг.

Спротивно на тоа, најмал број на споменати случаи е регистриран во Луксембург (8,9 проценти од луѓето), Шведска (11,6) и Холандија (13 проценти).

Неодамнешните изјави на американскиот претседател Доналд Трамп за Русија, вклучително и заканата од строго дефинирани тарифи против Москва, се сериозни и бараат понатамошна анализа, изјави портпаролот на Кремљ, Дмитриј Песков.

Трамп вчера најави нови испораки на оружје за Украина и предупреди дека купувачите на рускиот извоз би можеле да се соочат со санкции доколку Русија не се согласи на мировен договор за Украина.

Песков рече дека Владимир Путин ќе ги коментира предлозите само доколку смета дека е потребно.

Зборувајќи за новите испораки на оружје за Киев, Песков рече: „Одлуките донесени во Вашингтон, во земјите од НАТО и директно во Брисел, не се перципираат од Украина како сигнал за мир, туку како сигнал за продолжување на војната“.

Песков исто така повтори дека Русија е подготвена да продолжи со директните преговори со Украина и дека сè уште чека сигнал од Киев за тоа кога би можела да се одржи следната рунда мировни преговори.