Косовскиот дилер на дрога Реџеп Нуркан, кој по потерница на Интерпол бил уапсен на скопскиот аеродром поради бегство од германски затвор, каде што требало да одлежи седум години, во минатиот понеделник “исчезна” од скопскиот Основен суд 2

ИСТРАГА ЗА БЕГСТВОТО ОД СКОПСКИОТ СУД 2

Косовскиот дилер на дрога Реџеп Нуркан, кој по потерница на Интерпол бил уапсен на скопскиот аеродром поради бегство од германски затвор, каде што требало да одлежи седум години, во минатиот понеделник “исчезна” од скопскиот Основен суд 2 додека судскиот полицаец му телефонирал на колегата од портирницата, дознава неофицијално “Дневник”. Нуркан избегал додека чекал истражната судијка да го подготви решението за негово притворање.

Претседателот на судот Бојан Ефтимов против судскиот полицаец повел дисциплинска постапка. Министерството за правда од Ефтимов ќе побара и одговор дали судската полиција е законски надлежна да ги чува уапсените по меѓународна потерница и дали постои службена белешка со која приведениот и бил предаден на чување. Во Министерството велат дека кога ќе ги добијат тие информации ќе решат дали има основа да достават мислење до Републичкиот судски совет да поведе постапка против судијката или претседателот на судот.

– Доставената информација не ги содржи одговорите на главните прашања. Ќе бараме претседателот на судот да ни одговори која е вообичаената постапка во вакви случаи и кој е должен да ги чува уапсените по меѓународна потерница пред да им биде одреден екстрадициски притвор. Според законот, судската полиција нема таква надлежност. Ова е мошне битно и поради тоа дали вината е само кај судскиот полицаец – велат во Министерството.

Претседателот на судот вели:

– Надлежностите се посочени во законот за судови и во судскиот деловник. Се што треба ќе се утврди во дисциплинската постапка против дежурниот судски полицаец.

Неофицијално дознаваме дека инспектори од Интерпол во МВР само телефонски ја известиле истражната судијка Славјанка Јанковска, која го сослушала Косовецот, дека осудениот го предале на судската полиција.

– Инспекторите на Интерпол не смееле така да постапат, ниту судијката да се согласи. Во законот е точно посочено кој надлежен да ги спроведува приведените до суд, да ги чува додека се кај истражен судија, а по решението за притвор, да ги однесе во затвор. Откако лицата го добиваат статусот притворени, тие се во надлежност на затворската полиција. Таа ги спроведува до судот, седи со нив на судењата и ги враќа во затворот. Судската полиција е надлежна за безбедноста на судовите и за спречување на нереди во објектите – велат во Министерството.

Неофицијално се дознава дека истражната судијка му рекла на дежурниот судски полицаец да не го носи приведениот на вообичаеното место за чекање бидејќи решението ќе било бргу подготвено. Полицаецот изјавил дека отишол во блиската канцеларија да му телефонира на колегата од портирницата да не пушта странки во судот бидејќи вработените биле пуштени од работа порано поради празникот 11 октомври. Тој рекол дека бил отсутен само дваесетина секунди, а кога се вратил приведениот го немало. (Н.Н.С.)