Две гарсониери од 40 квадрати во Дојран и стан од 60 квадрати во Охрид е недвижниот имот што го поседуваат Стојан Андов од ЛП и неговата сопруга Марија.

Александра М. Митевска

Две гарсониери од 40 квадрати во Дојран и стан од 60 квадрати во Охрид е недвижниот имот што го поседуваат Стојан Андов од ЛП и неговата сопруга Марија.

Андов е првиот опозициски лидер што за „Време“ ја откри имотната состојба, откако Собранието минатата недела ја донесе Резолуцијата за поддршка на борбата против корупцијата. Со резолуцијата на сите функционери во државата им се наметнува етичка обврска да дозволат увид на јавноста во анкетните листови.

Сопружниците Андови во 1995 година ја префрлиле на нивниот син бараката во Скопје во која живеат. Андов има заштеда од 40 илјади евра и вози „фиат пунто“ од 2002 година, а неговата сопруга е сопственик на 50 акции во „Макпетрол“.

Неизвесно е дали и министрите, судиите, директорите на јавни претпријатија, ќе го следат примерот на пратениците, бидејќи Резолуцијата практично има само морална тежина, додека Законот за борба против корупцијата предвидува тајност на анкетните листови.

Премиерот Владо Бучковски вчера беше во Холандија, но од неговиот кабинет велат дека транспарентноста е принцип на работата на Владата. Од повеќето пратенички групи во Собранието вчера стаса одговор дека нивните пратеници ќе ја почитуваат резолуцијата за која гласаа.

Марјан Ѓорчев, претседател на Земјоделската партија, ја оценува Резолуцијата како политички памфлет и вели дека таа не може да биде над законот. Сепак, Ѓорчев вели дека за него не е проблем да каже што поседува. Тој во 1987 продал имот во Кавадаречко за да го купи станот од 87 квадрати во скопската населба Кисела Вода. Ѓорчев вози „голф“ од 1995 година, а неговата сопруга има „мицибуши“ од 1999.

Јани Макрадули, координатор на СДСМ, очекува сите пратеници од неговата група да дозволат увид во анкетните листови, како што направија во 2002. Тој вели дека во меѓувреме неговото семејство го продало станот во Скопје, а тој купил помал стан на свое име, бидејќи наскоро ќе се жени. Макрадули вози „рено клио“ од 2000 година и исплаќа кредит од 30 илјади евра за станот.

И Андреј Жерновски, шеф на пратеничката група на ЛДП, смета дека „неговите“ пратеници ќе ги отворат сметките како во 2002, но и поради тоа што се предлагачи на Резолуцијата. Жерновски објаснува дека во наследство добил поголем имот во центарот на Скопје, а го наследил и станот од 120 квадрати во кој живее. Негова лична своина е автомобилот „тојота корола“.

Рафиз Алити, координаторот на ДУИ, исто така, очекува функционерите од неговата партија да обезбедат транспарентност на имотните листови.Тој информира дека има двокатна куќа во Радуша и дека таму има и поголем имот што го обработува, а го наследил од татко му и од дедо му.

Алити поседува трактор и друга земјоделска механизација, а инаку вози „опел кадет“ од 1992 година.

Слободан Најдовски, потпретседателот на Собранието, кој ја иницираше резолуцијата, објаснува дека живее во семејната куќа од околу 100 квадрати во Кравари, Битолско. Има автомобил „тико“ од 1997 година, иако почесто вози „хјундаи“, сопственост на таткото на неговата сопруга. Најдовски имал и штеден влог од 17 илјади евра.

Чедомир Краљевски, координатор на ВМРО-НП, вели дека неговата партија практично е копредлагач на Резолуцијата и затоа ќе ја почитува. Краљевски има двокатна куќа во Куманово и стан од 60 квадрати во Скопје, за кои вели дека му се наследство. Вози „даеву-нубира“ и има тековна сметка на која имал околу 100 илјади денари.