Европската унија мора да почне со изработка на конкретни планови за справување со животот на континент кој, поради климатските промени, ќе биде потопол за 4 Целзиусови степени, порачаа научните советници на блокот. Тоа би значело прифаќање дека светот е на пат кон катастрофално зголемување на температурата, кое значително ќе ги надмине целите договорени со Парискиот климатски договор и масовно ќе го наруши животот на Европејците, пишува „Политико“.

„Европската клима брзо се менува. Тоа не е далечен или апстрактен ризик“, изјави ОТмар Еденхофер, претседател на Европски научен советодавен одбор за климатски промени.

Како што планетата се затоплува, екстремните временски појави како поплави и суши претставуваат сѐ поголема закана за европското општество, економијата и екосистемите. Во последните години десетици илјади Европејци починаа за време на топлотни бранови. Но, напорите на ЕУ да се подготви за сегашните и идните последици од глобалното затоплување се недоволни и фрагментирани и им недостига кохерентна визија, предупреди Еденхофер.

„На Европската унија ѝ недостасува заедничко разбирање за што колективно треба да се подготви, што доведува до недоследни процени на климатските ризици кои често го поткопуваат управувањето со ризиците“, рече тој.

Според мислењето на одборот, блокот треба да се заштити под претпоставка дека континентот до 2100 година ќе биде за 4 Целзиусови степени потопол отколку во прединдустрискиот период. Советот го одразува неодамнешниот план на француската влада да се подготви за Франција потопла за 4°C.

Покрај воспоставувањето заедничка почетна точка за подготовките, одборот препорачува уште четири мерки за Европа да стане поотпорна на климатските промени – од поставување обврзувачки цели за подготовка, до предлог ЕУ да го планира својот буџет околу климатските ризици.

Советите на одборот, независен конзорциум од високи научници задолжен со закон на ЕУ да дава насоки за климатската политика, често се покажуваат како влијателни. Неговиот извештај од 2023 година, кој препорача цел за намалување на емисиите од најмалку 90 проценти до 2040 година, одигра голема улога во поттикнување на институциите на блокот да ја усвојат таа бројка како своја цел.

„Нашите препораки се насочени кон претстојното законодавство“, рече Еденхофер.

Научниците наведуваат дека сушите во јужна Европа ќе стануваат почести и поинтензивни како што глобалните температури ќе продолжат да растат – според Меѓувладиниот панел за климатски промени (ИПЦЦ), повеќе од една третина од населението во регионот ќе се соочи со недостиг од вода при 2°C глобално затоплување, додека 3°C го удвојува тој удел. Ограничувањето на затоплувањето го ограничува и овој ризик.

За да се справат со преостанатиот ризик, земјите можат да воведат мерки за адаптација – како поттикнување на земјоделците да преминат на култури поотпорни на суша или управување со потрошувачката на вода. Колку затоплувањето е поголемо, толку е поголема опасноста од тоа одредени региони и економски сектори повеќе да не можат да се прилагодат.

Во моментов, ЕУ располага само со нејасна стратегија за адаптација од 2021 година. Повеќето земји членки имаат национални планови за адаптација или закони со релевантни елементи, но и Европската агенција за животна средина и Европскиот суд на ревизори предупредија дека законодавството значително се разликува низ блокот и дека некои стратегии се темелат на застарени научни сознанија.

Тоа не е доволно, смета советодавниот одбор. Меѓу петте препораки, научниците бараат ЕУ да развие кохерентна визија со „секторски специфични цели за адаптација, на пример за 2030 и 2040 година“, како и да најде начини за управување со растечките економски трошоци од климатските катастрофи, на пример преку буџетски и осигурителни механизми.

Тоа мора да се темели на заедничко референтно сценарио, велат научниците, препорачувајќи ЕУ да се подготви за глобално затоплување меѓу 2,8°C и 3,3°C над прединдустриските нивоа – што е во согласност со проекциите кои „имплицираат околу 4°C затоплување за Европа“, рече Еденхофер.

„Начелото на претпазливост“ бара од ЕУ да се подготви за тоа сценарио и исто така да ја „тестира отпорноста“ на своето планирање и на уште повисоки сценарија на затоплување, додаде Еденхофер, со оглед на неизвесностите околу глобалните напори за намалување на емисиите.

Врховниот лидер на Иран се закани дека ќе испрати американски носачи на авиони „на дното на морето“, додека започнуваат разговорите во Женева за да се избегне војна. Но, Хамнеи го отфрли американското воено засилување во Персискиот Залив откако Доналд Трамп минатата недела нареди распоредување на втор носач на авиони во регионот.

„Тие постојано велат дека испратиле носач на авиони во Иран“, рече врховниот лидер на Исламската Република. „Добро, носачот на авиони е опасна машина, но не е поопасно од оружјето што може да го испрати на дното на морето“.

Покрај тоа, Корпусот на исламската револуционерна гарда (ИРГЦ), елитна единица лојална на Хамнеи, започна поморски вежби во Ормутскиот теснец и објави дека привремено ќе затвори делови од клучната линија за превоз на нафта за време на вежбите со боева стрелба. Тоа би бил првпат тесниот влез во Заливот да биде блокиран од војните со танкери во 1980-тите.

Заканите на Хаменеи за потопување на американски воени бродови веројатно се насочени првенствено кон домашната публика, а не кон Вашингтон, но сепак ризикуваат да го налутат претседателот Трамп.

„Се чини дека американскиот претседател постојано повторува дека нивната армија е најсилна во светот“, рече Хаменеи. „Но, дури и најсилната армија во светот понекогаш може да добие шлаканица од која нема да се опорави.“

фото/ЕПА

Русија би можела да ја користи својата морнарица за да ги спречи европските сили да ги запленат нејзините бродови, а исто така би можела да возврати и на европскиот превоз ако бидат запленети руски бродови, изјави Николај Патрушев, близок сојузник на претседателот Владимир Путин.

Западните земји се обидуваат да ја исклучат Русија од глобалната трговија и да ѝ го одбијат финансирањето со воведување на повеќе од 30.000 санкции поради војната во Украина.

Тие, исто така, се обидоа да ги блокираат танкерите за нафта за кои се сомнева дека превезуваат руски пратки нафта.

Во јануари, САД запленија танкер за нафта под руско знаме како дел од напорите за ограничување на извозот на венецуелска нафта.

Рускиот претседател Владимир Путин ги опиша ваквите дејствија како пиратство.

„Ако не им пружиме силен отпор, наскоро Британците, Французите, па дури и балтичките земји ќе станат толку арогантни што ќе се обидат да го блокираат пристапот на нашата земја до морињата, барем до оние во Атлантскиот басен“, рече Патрушев, советник на Путин и претседател на Рускиот поморски комитет, за рускиот медиум „Аргументи и факти“.

„Веруваме дека, како и секогаш, најдобриот гарант за безбедноста на пловидбата е морнарицата. Во главните поморски области, вклучувајќи ги и регионите далеку од Русија, мора трајно да бидат распоредени значајни сили, сили способни да ги смират страстите на западните пирати“, рече Патрушев.