Обвинителството истражува дали има криминал во случајот со невратениот долг од кредитот што холдинг-компанијата БС го зела од Алмако банка во 1999 година, изјави за “Дневник” државниот јавен обвинител Александар Прчевски.

ПО ИНИЦИЈАТИВА НА АНТИКОРУПЦИСКАТА

Обвинителството истражува дали има криминал во случајот со невратениот долг од кредитот што холдинг-компанијата БС го зела од Алмако банка во 1999 година, изјави за “Дневник” државниот јавен обвинител Александар Прчевски. Антикорупциската комисија поднесе иницијатива до обвинителството да поведе кривична постапка против стечајниот управник на Алмако банка и одговорните во холдинг-компанијата БС за злоупотреба на службената положба бидејќи со овозможување да не се врати долг од земен кредит останале неисплатени побарувањата на повеќе доверители – државни органи и институции од вкупно 22.670.000 денари.

– Случајот е предаден во скопското Јавно обвинителство. Веќе е отворен предмет и случајот се испитува – вели Прчевски.

Договорот за земање долгорочен кредит од 806.870 германски марки помеѓу Алмако банка и холдинг-компанијата БС бил склучен на 25 јануари 1999 година. Кредитот требало да биде вратен во 40 еднакви тримесечни рати, почнувајќи од 30 март 2000 заклучно со 31 декември 2009 година, со бескаматен период од една година. Договорот го потпишале директорот на банката Методија Тошевски и директорот на холдингот БС, Олга Камшикоска. Холдинг-компанијата БС заради обезбедување на кредитите депонирала во банката 20 потпишани акцептни бланко-налози со овластување за нивно пополнување, три потпишани бланко-меници со менична изјава за пополнување и хипотека над недвижен имот на стечајниот должник АД “Скопјанка”. Има и клаузула според која фирмата без согласност на банката не смее да врши статусни промени до конечното враќање на кредитот и на каматата.

Бидејќи холдингот БС не си ги извршувал целосно договорените обврски, стечајниот управник на Алмако банка, Рајко Ковачевиќ, неколкупати во ноември 2001-ва, јануари, мај, октомври 2002 година упатувал дописи директно до директорот на БС, Борис Стојменов, да си ги платат обврските. Во еден од дописите е нагласено дека банката е во стечај, па според законот, мора да се плати целосниот долг. Судското решение обврзувало сите предмети и други имотни права веднаш да се претворат во пари.

Во друг допис стечајниот управник на Стојменов му напишал дека повеќе нема можности за отстапки за доцнењето на враќањето на долгот.

Но, сепак стечајниот управник не ги активирал оставените акцептни налози и хипотеката, туку се согласил долгот да се пренесе на фирмата “А” ДООЕЛ Скопје. Два и пол месеци подоцна, тој до Агенцијата за блокирани сметки доставил налог на наплата на акцептен налог на 5.204.226 денари, но налогот бил вратен со образложение дека должникот има судско решение за затворен стечај. Еден месец претходно, на 16 декември 2002 година, во Основниот суд 1 во Скопје била отворена стечајна постапка за холдингот БС, за долг од 57.828.000 денари. Стечајната постапка веднаш била заклучена со образложение дека должникот, холдинг-компанијата БС нема имот, па е неликвиден и не може да ги исполни своите парични обврски, а жиро-сметката 45 дена му била непрекинато блокирана. (Н.Н.С.)