Во последните денови силно невреме ги зафати Србија, Босна и Херцеговина и Хрватска, кое донесе обилни врнежи, бурни ветрови и проблеми во сообраќајот. Метеоролошките служби ширум регионот предупредуваат на продолжување на неповолните временски услови, а локалните власти се во состојба на готовност за можни поплави и оштетувања на инфраструктурата.

Србија: Обилни дождови и закана од излевање на реки

Републичкиот хидрометеоролошки завод на Србија (РХМЗ) издаде предупредување за обилни врнежи од дожд кои ќе траат до 28 март, со количина на дожд од 60 до 80 мм локално и повеќе. Најмногу врнежи се очекуваат во западните, централните и југозападните делови од земјата.

Посебна опасност претставуваат зголемените водостои на неколку реки каде што постои можност за поројни водни текови. Надлежните апелираат до граѓаните да бидат внимателни и да ја следат состојбата на терен.

Босна и Херцеговина: Надојдени реки и вонредна состојба

Во Сараево и низ цела Босна и Херцеговина дождот не престанува со денови, а водостојот на реките, особено на Миљачка, постојано се зголемува. Хидрометеоролошкиот завод издаде портокалово предупредување за неколку региони, меѓу кои Сараево, Тузла и Ливно, поради можност од поплави и проблеми во сообраќајот.

Сојузната управа за цивилна заштита е во состојба на готовност, а на граѓаните во загрозените подрачја им се препорачува да преземат заштитни мерки. Во Маглај поради покачувањето на водостојот на реката Босна во прекин е сообраќајот на градскиот мост, додека во одредени населби обилните врнежи предизвикаа одрони и поплави во некои домаќинства.

Хрватска: Силните ветрови соборуваат дрвја и го попречуваат сообраќајот

Хрватска ја погодија силни бурни ветрови, особено во Загреб, каде налетите на ветровите достигнаа брзина од 60 км/ч. Во главниот град беа соборени дрвја, оштетени тераси од кафеаните, а некои делови од градот останаа без трамвајски сообраќај поради оштетување на напонската мрежа. Поради силни налети на ветер, прекината е работата на жичарницата.

Државниот хидрометеоролошки завод на Хрватска најави продолжување на облачното и ветровито време, со повремени врнежи од дожд и можност за дополнителни потешкотии во сообраќајот и секојдневниот живот на граѓаните.

Метеоролозите најавуваат дека неповолните временски услови ќе продолжат и во наредните денови, а можни се дополнителни проблеми во сообраќајот, снабдувањето со електрична енергија и вода, како и дополнително излевање на реките во ризичните подрачја. Властите во сите погодени земји преземаат заштитни мерки, а на граѓаните им се препорачува да бидат внимателни и да ги следат официјалните метеоролошки извештаи.

Американскиот претседател Доналд Трамп се закани дека ќе воведе многу повисоки тарифи за Европската Унија (ЕУ) и за Канада доколку соработуваат во борбата против царините.

„Доколку Европската Унија застане на страната на Канада за да им нанесе економска штета на САД, тие ќе бидат погодени со огромни царини, многу поголеми од моментно планираните, за да го заштитат најдобриот пријател што секоја од овие две земји некогаш го имала“, објави Трамп на Truth Social.

Трамп вчера објави дека ќе воведе царина од 25 отсто за сите автомобили што не се произведени во САД, а давачките ќе стапат во сила на 2 април. Помошникот на Трамп во Белата куќа, Вил Шарф, објасни дека новите царини се однесуваат на странските автомобили и на лесни камиони и доаѓаат како дополнување на веќе воведените тарифи.

Најзначајно, тарифите ќе важат и за автоделовите – од кои многу се испорачуваат во САД од странство и се користат за производство на американски автомобили. Шарф процени дека мерките ќе резултираат со „над 100 милијарди долари нов годишен приход“ во САД.

Глобалните пазари се во превирања бидејќи се отвори нов фронт во ескалирачката глобална трговска војна. Акциите на американските и на азиските производители на автомобили паднаа по објавата на Трамп. Трамп веќе ги промени долгогодишните глобални трговски односи со воведување увозни царини за стоки што доаѓаат од Мексико, Канада и од Кина, како и давачки за целиот увоз на челик и алуминиум.

Белата куќа вели дека најновите царини ќе ја заштитат и зајакнат американската автомобилска индустрија, иако аналитичарите посочуваат дека американските производители на автомобили користат делови од целиот свет за да ги склопат, што значи дека и тие би можеле да бидат засегнати од царините.

ЕУ и Канада допрва треба да издадат изјава во која сугерираат дека ќе се обединат за да им наштетат на САД, како што беше наведено во најавата на Трамп, но и двете сигнализираа дека може да возвратат на најновите царини, пренесуваат медиумите во светот.

Министерката за надворешни работи на Германија, Аналена Бербок, денеска изјави дека Европската одбранбена унија повеќе не е прашање на „ако“, туку „колку бргу“ таа ќе биде формирана.

На конференцијата „Европа 2025“ за европскиот суверенитет Бербок рече дека европската одбранбена индустрија е сè уште национална по природа и дека затоа не е многу ефикасна.

„Ако продолжиме да користиме 150 системи за оружје во Европа, кои не се компатибилни еден со друг, можеме да ги потрошиме сите пари во светот – нема да бидеме доволно ефикасни, затоа верувам дека Европската одбранбена унија не е прашање на ‘дали’, туку ‘колку бргу’ ќе го постигнеме тоа“, рече таа, пренесува „Ројтерс“ од „Танјуг“.