Во САД, во вторник, ќе се одржат претседателските избори, на кои 225 милиони Американци со право на глас ќе бираат помеѓу кандидатот на демократите Хилари Клинтон и републиканскиот кандидат Доналд Тамп.

Медиумите, повикувајќи се на анкетите, оценуваат, дека овие избори ќе бидат едни од најнеизвесните во историјата. Според најновата анкета на „Блумберг“ и институтот за истражување на јавното мислење „Селзер“, покажува дека Хилари Клинтон е во водство со три проценти пред Трамп.

Ова истражување покажаува дека за Клинтон би гласала 44 отсто од испитаниците, а 41 отсто поддршката би му ја дале на Трамп.

Меѓу останатите кандидати, либертаријанскиот кандидат Гери Џонсон има поддршка на четири отсто од испитаниците, а за кандидатот на Зелената партија Џил Стајн својот глас би го дале два отсто од испитаниците.

Предизборната кампања ја обележа беспоштедната борба на Хилари и Трамп и константините меѓусебни обвинувања за неспособност, но и аферата со истрагата на ФБИ против Клинтон, во врска со користењето на приватната електронска пошта.

Кампањата, исто така, ја обележаа спорните изјави на Трамп во врска со жените, бегалците, но и скандалот дека избегнувал да плаќа данок.

Предизборната кампања во САД внимателно се следеше низ светот, вклучувајќи го и Балканот. Земјите од овој дел на Европа, најмногу ги интересира што ќе значи изборот на Хилари или Трамп за Балканот.

Инаку, 225 милиони Американци гласаат во еден круг со секоја од 50-те сојузни држави и градот Вашингтон.

Победа во одредена држава одредува како ќе гласаат членовите на Електорскиот колегиум, тело кое го бира претседателот на САД.

Колегиумот има 538 членови, а сојузните држави во ова тело се застапени според бројот на жители.

Државата која има најмногу жители, Калифорнија, има најмногу електори (55), а следуваат Тексас (38), Њујорк и Флорида (по 29), додека ретконаселените држави Алјаска, Вермонт, Далавер, Вајоминг или Монтана имаат само по три електори.

Членовите на изборниот колегиум претседателот и потпретседателот го избираат на 19.декември, но тоа најчесто преставува само формалност.

Во речиси сите држави електорите ги добива кандидатот кој ќе освои поголем број на гласови, без оглед со која разлика ќе победи, исклучок се само државите Небраска и Мејн, каде електорите се делат според бројот на освоени гласови.

Ваквиот систем им оневозможува на кандидатите на третите опции да стигнат до Белата куќа.

Некои држави традиционално гласат за демократите, а други за републиканците, поради што кандидатите изборните кампањи ги форсираат во оние држави кои од избори до избори ја „менуваат страната“. Најважни меѓу овие држави се Флорида (29), Пенсилванија (20) и Охајо (18).

Претседателските избори започнаа во селото Диксвил Ноч во државата Њу Хемпшир, каде кандидатот на демократите Хилари Клинтон го победи својот противник Доналд Трамп со 4-2.

Според традицијата гласачите во селото Диквил Ноч гласаат први, веднаш по полноќ според локално време (6 часот по централноевропско време).

На изборите во САД се гласа на територија која е поделена во четири временски зони, а избирачките места се отвораат во 6 часот.

Биралиштата се затвораат во 19 часот по локално, односно 1 часот по централноевропско време. крај/мф/нц