Папата Франциско пишува дека знае низ што минуваат заразените од Ковид-19 бидејќи како млад едвај преживеал тешка респираторна инфекција.

На Франциско во родната Аргентина му бил отстранет поголем дел од белодробното крило поради болест во 1957 година кога имал само 20 години.

„Со месеци не знаев кој сум, не знаев дали ќе преживеам. Дури и лекарите не знаеја дали ќе успеам“, се сеќава 83-годишниот папа во новата книга.

„Еден ден ја прегрнав мајка ми и ја прашав дали ќе умрам… Од тоа искуство знам низ што поминуваат пациентите со коронавирус кога се борат за здив“.

Ова се цитати од книгата „Ајде да сонуваме: Патот кон подобра иднина“, која Франциско ја напиша со својот англиски биограф Остин Ајвери.

Книгата ќе биде објавена на 1 декември, а овие цитати денеска ги објави италијанскиот дневен весник „Ла Република“.

Во претходните 24 часа во Романија се регистрирани 4.207 новозаразени од коронавирус, објави Стратешката комуникациска група (ГЦС). Тоа е намалување во споредба со вчера кога бројот на новозаразени беше 5.837.

Вкупниот број на лица заразени од коронавирус е 422.852, изјави ГЦС, објави „Аџерпрес“.

Во текот на последните 24 часа 130 лица починале од коронавирус така што вкупниот број на смртни случаи е 10.177.

Во специјализирани одделенија во болници има 13.685 лица со Ковид-19, од кои 1.160 се на оддели за интензивна нега.

Вкупно 296.844 лица се излечиле од коронавирусот.

Според податоците на ГЦС, во изминатите 24 часа биле извршени 9.938 теста, а од почетокот на епидемијата биле извршени вкупно 3.908.681 тест.

Белоруската полиција уапси речиси 350 демонстранти поради кршење на мерката забрана на масовни собири, се вели во соопштението на белоруското Министерство за внатрешни работи.

Се наведува дека граѓаните од внатрешноста на Белорусија не одговориле на повикот за масовни протести, а ситуацијата во Минск била поинаква и демонстрантите се собрале и покрај предупредувањата на властите да не го сторат тоа, пренесе ТАСС.

Полицијата соопшти дека се водат истраги против демонстрантите што давале отпор при интервенцијата на припадниците на полициските сили и го блокирале сообраќајот на улиците во Минск.