Европа
Аналитичар: Шојгу оди на уште повисока позиција, каде ќе оди сега Патрушев, останува да видиме

Во екот на засилената офанзива во Украина, каде руските сили интензивно напаѓаат и напредуваат во областа Харков и во Доњецк, силно одекна веста за разрешувањето на долгогодишниот министер за одбрана Сергеј Шојгу.
Рускиот претседател Владимир Путин сосема неочекувано го разреши Сергеј Шојгу и на функцијата министер за одбрана го назначи Андреј Белоусов, поранешен вицепремиер задолжен за економија.
Путин, како што често се случува со ненадејните промени во Кремљ, не го отстрани Шојгу од номенклатурата на власта. Напротив, Шојгу ќе ја преземе функцијата секретар на рускиот Совет за безбедност, која претходно ја вршеше моќниот Николај Патрушев од кругот на најблиски соработници на Путин од почетокот на неговото доаѓање на власт.
Сенка на сомнеж и нејаснотија фрла и настанот од пред неколку недели, кога Тимур Иванов, заменик на Шојгу во Министерството за одбрана, беше уапсен под обвинение за примање поткуп.
Иванов беше еден од најдоверливите соработници на Шојгу, па се шпекулираше дека неговото апсење е предупредување за Шојгу дека му се тресе министерската фотелја.
Но, што би значело преместувањето на Шојгу на чело на Советот за безбедност, тело кое практично го надгледува целиот воено-индустриски и разузнавачки комплекс? Во Русија, која е во војна, ова не изгледа како деградација.
Ректорот на Универзитетот во Верн и геополитички аналитичар Влатко Цвртила за хрватски Н1 забележува дека Шојгу од позицијата министер за одбрана се сели на уште поважна функција и не ја смета за изненадувачка оваа кадровска промена. Оваа функција, вели тој, дава контрола врз целиот безбедносен систем, а со тоа и огромно влијание.
„Знаеме дека пред две години имаше смена на одредени генерали, знаеме и за бунтот на Вагнеровата група, а апсењето на заменикот на Шојгу најави дека некои работи во Министерството за одбрана може поинаку да се уредат. На крајот се случи. Затоа би рекол дека Шојгу не е разрешен, туку дека заминал на функција од која ќе има големо влијание врз целиот безбедносен систем“, изјави Цвртила.
Тој смета дека оваа кадровска рокада не е целосна, но изгледа дека Шојгу не е губитник во ситуацијата. На новата функција тој ќе има уште пошироки овластувања од претходно.
„Сега треба да видиме каде ќе оди Патрушев со оглед на тоа што тој беше сивата еминенција на целиот безбедносно-разузнавачки систем. Треба да видиме која ќе биде неговата нова функција, бидејќи тоа можеби ќе ни даде одговор на прашањето кој всушност е сменет во целата оваа приказна“, посочува Цвртила.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Човек на Трамп: Предлогот на Путин е апсурден

Кит Келог, специјалниот претставник на американскиот претседател Доналд Трамп за Украина и Русија, го отфрли предлогот на рускиот претседател Владимир Путин за тридневен прекин на огнот. Келог истакна дека Вашингтон бара долгорочно примирје.
Коментирајќи го напредокот на мировните преговори во последните денови, тој изрази верување дека САД „се во прилично добра позиција кога станува збор за Украинците“. „А тридневно примирје е апсурдно“, нагласи тој, осврнувајќи се на предложеното примирје од 8 до 10 мај.
Тој додаде дека Трамп се залага за сеопфатен прекин на огнот „на море, во воздух и на копно“ што ќе трае најмалку 30 дена. „И потоа можеме да го продолжиме“, изјави тој.
„Кога ќе погледнете на сè околу што Украинците се подготвени да соработуваат, сега е до Русите, до Путин. Имаме една страна, ни треба друга страна. И мислам дека сме блиску“, продолжи тој.
Путин најави уште едно примирје кое ќе започне на полноќ на 8 мај и ќе трае до полноќ на 11 мај. Италијанската премиерка Џорџа Мелони изјави дека тридневното примирје објавено од Кремљ не е доволно, туку дека е потребен праведен и траен мир.
Британската одбранбена разузнавачка агенција верува дека тридневниот прекин на огнот што го објави Путин на Денот на победата има за цел да ја прикаже Русија како отворена за преговори и да ги ограничи украинските напади со долг дострел.
Европа
Фон дер Лајен: Светската трговија се врти кон Европа

Светската трговија се насочува кон Европа затоа што другите земји сакаат договори со ЕУ, изјави денес претседателката на Европската комисија, Урсула фон дер Лајен.
Претседателот на ЕК на митингот на Европската народна партија во Валенсија истакна дека Европската унија „веќе има најголема мрежа на договори за слободна трговија, 76 од нив“ со земји од целиот свет.
„Сега светската трговија се свртува кон нас“, смета фон дер Лајен, во време кога светот е загрозен од воведувањето на американските царини што ги објави американскиот претседател Доналд Трамп на почетокот на април.
„Сега соработуваме со Индија и Индонезија, Обединетите Арапски Емирати и Тајланд, Филипините и Малезија, со Пацификот. Сите тие сакаат договор со нас. Бидејќи ние сме фер, сигурни и играме според правилата“, нагласи таа. „Затоа, да останеме на тој пат, со ладна глава и обединети“, рече таа.
Фон дер Лајен изјави дека ЕУ мора паралелно да работи на зајакнување на својот единствен пазар преку елиминирање на непотребните национални бариери, борба против фрагментацијата и бирократијата.
Европа
(Видео) Пукање во Шведска, најмалку тројца убиени

Најмалку три лица се убиени во пукотница во фризерски салон во градот Упсала, потврди шведската полиција. Полицијата соопшти дека добила повеќе пријави од граѓани кои пријавиле истрели во близина на плоштадот Ваксала во центарот на градот.
Пукањето се случило во пресрет на Валпургиската ноќ, традиционален пролетен фестивал кој привлекува голем број луѓе на улиците секоја година. Според полицијата, неколку лица биле пронајдени со повреди што укажуваат на прострелни рани.
Shocking news from Uppsala-Sweden
Multiple fatalities in a shooting at Vaksala Square. Police confirm several injured, TV4 reports more victims deceased. Serious incident unfolding. #UppsalaShooting pic.twitter.com/nGPTd05Tmw— Niyak Ghorbani (نیاک) (@GhorbaniiNiyak) April 29, 2025
Шведските медиуми јавуваат дека маскираниот убиец избегал со електричен скутер и дека е во тек голема потрага, вклучувајќи го и учеството на полициски хеликоптер.
Голем дел од областа е ограден, а истрагата е во тек. Портпаролот на полицијата, Магнус Јансон Кларин, за локалните медиуми изјави дека добиле повеќе пријави за истрели во областа.
Идентитетите на жртвите и напаѓачот засега не се познати, ниту пак мотивот за нападот.