Полицијата во неколку европски земји вчера спроведе огромна, координирана операција против Ндрангета, најмоќната и најбога италијанска мафија, која го контролира најголемиот дел од кокаинот што се продава во Европа, пренесува „Еурактив“.

Според Европската агенција за спроведување на законот на ЕУ (Европол), најмалку 132 лица биле приведени во рации во раните утрински часови како дел од синхронизираната рација, во која учествуваа осум европски земји плус Бразил и Панама.

Повеќето од апсењата биле во Италија, а другите се концентрирани во Германија и Белгија, во операцијата за која Европол соопшти дека вклучувала повеќе од 2.770 полицајци.

„Ова е веројатно најголемата операција досега спроведена во Европа против калабриската мафија“, изјави Ерик ван Дујзе, портпарол на Федералното обвинителство на Белгија, кое ја почна истрагата пред пет години.

🚨 132 ‘Ndrangheta mafia members arrested after investigation by Belgium, Italy & Germany.

👮 Europol & @Eurojust supported the international operation, which is the largest-ever coordinated hit against Italian organised crime.

Press release ⤵️https://t.co/QSwiY6Cupm#EMPACT pic.twitter.com/xwsXrE63Wi

— Europol (@Europol) May 3, 2023

Во рацијата претресени биле околу 150 адреси во Италија, Германија, Белгија, Франција, Португалија, Словенија, Шпанија и во Романија, при што во Италија, Португалија, Германија и во Франција биле запленети средства и имот во вредност од 25 милиони евра.

„Апсењата на членовите на Ндрангета во Италија и во странство претставуваат уште еден важен резултат од борбата против криминалните организации“, истакна италијанскиот министер за внатрешни работи, Матео Пјантедоси.

Уапсените се осомничени за повеќе злосторства, вклучувајќи мафијашко здружување, трговија со дрога, трговија со оружје, перење пари и даночна измама, во рамките на строго доверливата истрага што го потврди глобалниот досег на Ндрангета.

Според Европол, операцијата „Еурека“ е најголемиот удар врз италијанскиот поликриминален синдикат досега и беше фокусирана на криминалната мрежа предводена од неколку семејства во Ндрангета од градот Сан Лука, во јужната италијанска провинција Реџо Калабрија.

Мрежата била посветена главно на меѓународна трговија со дрога од Јужна Америка во Европа, како и Австралија, а имале врски со колумбискиот картел Заливски клан и со албанска група што оперира во Еквадор и во Европа.

Криминалната организација родена во јужниот италијански регион Калабрија е најмоќната италијанска мафија што оперира во повеќе од 40 земји и која, освен главниот извор на богатство, трговијата со дрога, се занимава и со други криминални активности користејќи параван компании за инвестирање нелегални добивки во легитимната економија во светот.

Ндрангета се најде на глобалната мапа на криминалот по крвавата пресметка меѓу ривалските кланови од Сан Лука во 2007 година кога во германскиот град Дуисбург беа убиени шест лица.