Европа
(Видео) Репортажа на Би-би-си од Авдиивка: „Нашите војници имаат само пушки, Русите имаат сѐ“

Би-би-си објави репортажа од Авдиивка, град во источна Украина, кој руските сили се обидуваат да го освојат со месеци и го претворија во урнатини.
Според последните информации, падот на Авдиивка е само прашање на време.
„Раката на мажот изгледаше непрепознатливо. Како скршена и помодрена праска. Или како камен“, рече хирургот на украинската армија чукајќи со замрзнатите прсти.
Тоа беше втор случај на смрзнатини што тој ги лекува ова утро стоејќи покрај импровизирана операциона маса, скриена во мала куќа во близина на опколените урнатини на украинскиот град Авдиивка, на линијата на фронтот. „Веројатно, ќе ги изгуби и двете раце“, рече хирургот.
Како што руската инвазија се приближува кон крајот на својата втора година, расположението меѓу украинските бранители се влошува. Исцрпеноста, фрустрацијата од недостигот на оружје и сознанието дека нема да има брза воена победа – сето тоа си го зема данокот.
„Мојот најдобар пријател беше убиен утрово“, извикуваше еден војник додека се пробиваше низ задната врата во добро скриената теренска болница на 47. бригада.
„Тешко е. Непријателот има многу од сѐ, секаква опрема, а ние немаме речиси ништо“, рече уште еден ранет, 24-годишниот Андриј. Руска артилериска граната го погоди неговиот ров во текот на ноќта, а парче шрапнел му го прободе глуждот.
Хирургот Виталиј пред војната работел во детска болница. Тој уморно зборуваше за своето искуство со ампутирање на екстремитетите минатата година за време на неуспешната украинска контраофанзива на руските мински полиња и за навидум бескрајната рехабилитација на рани од шрапнел.
„По неколкумесечни борби, силите на Кремљ се чини дека се блиску до урнатините на Авдиивка, а некои украински војници лично признаа дека градот, местото на некои од најжестоките борби во војната досега, може да падне во секој момент. „Вознемирени сме“, рече украинскиот офицер Олексиј од 110. механизирана бригада на Украина стоејќи покрај огромен подвижен топ додека звукот на руските пушки татнеше во далечината“, се вели во репортажата на Би-би-си.
Никој нема да ги брани купиштата урнатини и изгореното железо во Авдиивка, изјави вчера Дмитро Лихови, портпарол на украинските вооружени сили во регионот Таури. Според него, приоритет на воената команда е да ги зачува животите на бранителите на тој уништен град на истокот на Украина.
Руските сили со месеци се обидуваат да го освојат Авдиивка, стратешки важен град на истокот на Украина. Во последно време Русите постигнаа голем напредок и прекинаа неколку важни патишта за снабдување. Падот на Авдиивка се очекува да биде прашање на денови, а доколку и кога ќе се случи, тоа ќе биде првиот украински град заземен од Русите во последните осум месеци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Русија го нападна Киев, Украинците јавуваат за 12 повредени

Русија изврши напади со беспилотни летала врз украинскиот главен град Киев и Миколаев на југот на земјата во текот на ноќта, при што беа повредени најмалку 12 лица, соопштија властите.
Две жени се повредени во главниот град, каде што дроновите предизвикаа пожар во магацин и оштетија станбени згради, соопшти градската воена управа на Киев.
Украинските воздухопловни сили соопштија дека собориле 85 од 145 беспилотни летала лансирани од Русија во нејзиниот напад во текот на ноќта. Се додава дека 49 други не успеале да ги постигнат своите цели, најверојатно, поради контрамерки од електронско војување.
Воздухопловните сили не разјаснија што се случило со преостанатите 11 беспилотни летала.
Во нападот во текот на ноќта беа повредени и 10 лица во јужниот град Миколаев, изјави регионалниот гувернер Виталиј Ким.
Во рускиот напад оштетени се и девет станбени згради, 30 гаражи и една административна зграда, додаде тој.
Русија негира дека намерно гаѓа цивили, но илјадници се убиени и повредени во нејзината инвазија на Украина.
Европа
Злосторство од 1995 година: награда од 20.000 фунти за оној што ќе го открие убиецот на Британката

Злосторството што се случило пред речиси три децении останува неразјаснето, а ќерката на жртвата сега упатува јавен апел за помош.
Џенет Браун, 51-годишна мајка на три деца, беше брутално убиена на 10 април 1995 година во нејзиниот дом во Бакингемшир, Англија. Нејзиниот убиец никогаш не бил пронајден.
Полицијата има примерок од ДНК пронајден на местото на злосторството, за кој верува дека му припаѓа на убиецот, но не одговара на ниту едно лице во полициската база на податоци. Во текот на истрагата беа испрашани повеќе од 1.000 мажи, но сите беа исклучени од истрагата.
Се нуди награда од 20.000 фунти за информации кои ќе доведат до апсење и осудување на сторителот, а секој што има информации може анонимно да контактира со Crimestoppers.
Џенет Браун работела како медицински истражувач во болницата Џон Редклиф во Оксфорд. Таа била пронајдена гола, со лисици на рацете и со превез преку устата, на дното од скалите, се било полно со крв. И покрај околностите, полицијата не верува дека мотивот бил од сексуална природа, а од домот ништо не е украдено.
Нејзината најстара ќерка Зара Харден вели дека сè уште не може да разбере зошто некој би ја нападнал нејзината мајка: „Тоа ми е целосно несфатливо, но убедена сум дека некој знае нешто“, рече таа.
„Таа беше врзана и брутално претепана, буквално претепана до смрт. Не е важно што никој не се јави тогаш, сè уште не е доцна”, рече таа.
Во моментот на убиството децата на Џенет Браун, Зара, Бенедикт и Роксана, не биле дома, а нејзиниот сопруг д-р Греам Браун бил на службено патување во Швајцарија.
Убиецот прво се обидел да го пресече стаклото на двојните лизгачки врати, а потоа го скршил стаклото и насилно влегол во куќата. Се верува дека Џенет била убиена во периодот од 20.15 до 22.15 часот истата вечер. Телото следното утро го пронашол градежен работник кој со синот требало да работи на куќата.
„Убиецот или убијците останаа неказнети до ден-денес. Сакаме да бидат кривично гонети. Некој способен за ваков вид на криминал се уште е на слобода и сакаме да спречиме вакво нешто да се повтори“, рече Харден.
Питер Бирн, шеф на тим за ревизија на нерешени тешки злосторства на полицијата, рече: „Сè уште верувам дека има луѓе кои имаат информации или сомневања во врска со ова брутално убиство“.
„Имаме ДНК профил од местото на злосторството. Тој не припаѓа на членовите на семејството и веруваме дека тоа би можело да биде клучен доказ кој го поврзува убиецот со злосторството“, рече Бирн.
Европа
Кралот Чарлс и Камила ненајавено го посетија папата Франциско

Папата Франциско вчера имаше ненајавена средба со британскиот крал Чарлс Трети и кралицата Камила, кои се во посета на Италија, соопштија Ватикан и Бакингемската палата.
Портпаролот на Бакингемската палата рече дека кралот и кралицата се „воодушевени“ што папата е во доволно добра здравствена состојба за да ги прими, откако средбата претходно беше откажана поради здравствената состојба на папата.
Чарлс Трети и Камила требаше да имаат официјална државна посета на Ватикан, заедно со посетата на Италија, но таа беше откажана откако лекарите му препишаа на Франциско два месеци одмор и закрепнување по хоспитализацијата.
Папата приватно ја прими кралската двојка и им посака се најдобро за нивната 20-годишнина од бракот, која ја прославија во среда, се вели во соопштението на Ватикан.
Франциско и Чарлс се сретнаа двапати претходно, во 2017 и 2019 година, пред актуелниот британски монарх да стане крал.
Покојната кралица Елизабета го посети папата Франциско во Ватикан во 2014 година.
Папата се уште се опоравува по престојот во болница со билатерална пневмонија.
Гласот и мобилноста на папата Франциско продолжуваат да се подобруваат благодарение на неговите секојдневни вежби, соопшти во вторникот Канцеларијата за печат на Ватикан.
Кралот Чарлс Трети од февруари 2024 година се лекува од рак, чиј тип никогаш не беше јавно објавен, а беше откриен по операцијата за зголемена простата.