Европа
(Видео) Спасувачите ги извлекуваат мртвите бебиња од поплавите: апокалиптични сцени од Шпанија, владее хаос

Спасувачите во Шпанија ги извлекуваат мртвите бебиња од поплавите што ја зафатија оваа европска земја. Досега се извлечени телата на најмалку две бебиња, а бројот на загинати во невидените поплави надмина 50.
Како што јавија локалните медиуми, спасувачите ги извлекле телата на четири лица, двајца мажи, една жена и едно бебе во градот Паипорта. Во градот Торент спасувачите пронашле пет безживотни тела, меѓу кои и бебе.
Најтешко беше погодена Валенсија, каде што неколку лица сè уште се водат за исчезнати.
Туристите што дојдоа да ја посетат Валенсија велат дека биле заробени во возилото речиси 10 часа. Виталиј Фарафонов и неговата сопруга биле во посета на Валенсија кога полицијата синоќа околу 20 часот ги извлекла од автопатот.
„Беше хаос. Изброивме девет или 10 превртени камиони на дел од автопатот за помалку од еден километар. Никогаш не сме виделе такво нешто“, рече Фарафонов.
Снимките што кружат покажуваат како луѓе се обидуваат да се спасат од поплавите качувајќи се на дрвјата. Властите користат хеликоптери за да ги спасат жителите од нивните домови.
Други видеа споделени од шпанските радиодифузери покажуваат дека водата навлегува во куќите додека автомобилите ги носи низ улиците.
Радио и ТВ-станици добија стотици повици за помош од луѓе заробени во поплавените подрачја или во потрага по најблиските бидејќи службите за итни случаи не можеа да стигнат до сите погодени локации.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Украина: Русите го зголемуваат военото присуство во Мариупол

Руските сили продолжуваат да го зголемуваат своето воено присуство во привремено окупираниот град Мариупол. Како што соопшти денеска на Телеграм градскиот совет на Мариупол, во градот веќе се формирани две воени бази.
„Руските окупатори го прошируваат своето воено присуство во Мариупол“, се вели во соопштението.
Според Центарот за проучување на окупацијата, во текот на март и април 2025 година се појавиле две нови воени бази: една во областа Калмиус на северозапад од градот и логистичка база во областа Ливобережњи, во станбената зона „Шхидни“. Втората база, како што се наведува, главно се користи за сместување на персонал и воена опрема.
„На овој начин руските окупатори постепено го зголемуваат своето присуство во Мариупол. Центарот за проучување на окупацијата нагласува дека ова е план за трансформирање на градот во главна и полноправна логистичка и воена база, не само за стоки, туку и за опрема и персонал. Со широка мрежа на паркинзи, бази за поправка и точки на трајно и привремено распоредување на персонал. Ова е олеснето и со развојот на железничките и пристанишните врски што ги спроведуваат окупаторските власти“, се вели во соопштението на градскиот совет на Мариупол.
Европа
Знамиња со кукасти крстови се појавија во Стокхолм на роденденот на Хитлер, полицијата започна истрага

Три нацистички знамиња со кукасти крстови беа поставени на влезот на автопат во областа Есингеледен во Стокхолм, главниот град на Шведска, на 20 април, на роденденот на Адолф Хитлер.
Портпаролот на полицијата во Стокхолм, Матс Ериксон, изјави дека започнале истрага за злосторство од омраза.
Ериксон нагласи дека не е соодветно да се случуваат такви работи во Шведска. Тој посочи дека на влезовите на автопатите често се појавуваат транспаренти со политички пораки.
„Конкретно активистите споделуваат политички пораки бидејќи тука има густ сообраќај. Не е убаво да се споделуваат такви пораки“, рече Ериксон.
Тој додаде дека нацистичкото знаме најверојатно било поставено за да го одбележи роденденот на нацистичкиот диктатор Адолф Хитлер, кој е роден на 20 април.
Европа
Објавени првите фотографии од телото на папата Франциско: во рацете има бројаница

Ватикан утрово ги објави првите фотографии од телото на папата Франциско. Неговото тело е положено во едноставен дрвен ковчег, со бројаница во рацете, митра на главата и облечен во црвена литургиска одежда, ден откако почина од последиците од мозочен удар во неговиот дом.
Телото на папата Франциско се уште се наоѓа во неговиот дом Санта Марта, каде што тој се опоравуваше откако помина повеќе од еден месец во римската болница Гемели поради билатерална пневмонија.
Според планот, утре, 23 април, среда, телото ќе биде преместено во базиликата Свети Петар за да можат верниците да им оддадат почит.