Европа
Во Киев пристигнува неочекуван пакет: Европската Унија подготвува изненадување за Зеленски, но и за Путин

Европската Унија продолжува да ѝ дава на Украина воена помош, вклучително оружје, муниција и воена опрема, како и обука за воен персонал и би можела да ги одобри првите пет милијарди евра оваа година во рамките на Европскиот фонд за мир за следната година, рече високиот претставник на ЕУ за надворешна политика и безбедност, Жозеп Борел.
„Предложив нов билатерален повеќегодишен пакет во рамките на Европскиот мировен фонд (ЕПФ), до пет милијарди евра за следната година. Се надевам дека ќе успееме да постигнеме договор пред крајот на годината кога земјите членки треба да се договорат за ревизија на повеќегодишната финансиска рамка“, рече Борел во понеделникот на прес-конференција во Киев по состанок на Советот на ЕУ за надворешни работи, пренесува „Укринформ“.
Тој истакна дека разговорите одржани во Киев со учество на европски министри помогнаа подобро да се разбере безбедносната димензија на ситуацијата во Украина, која, како што рече, била централна тема со украинскиот претседател Володимир Зеленски и министерот за надворешни работи, Дмитро Кулеба.
„Разговаравме за безбедносните обврски што сакаме да ѝ ги обезбедиме на Украина покажувајќи ја нашата решеност да застанеме на страна на Украина на долг рок, да ги одвратиме актите на агресија и да се спротивставиме на напорите на Русија за дестабилизација“, рече Борел.
Тој додаде дека обуката на украинските војници продолжува и дека целта е во наредните месеци да се обучат 40.000 војници, што вклучува и специјализирана обука за пилоти на ловци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Украинците објавија снимка: „Со беспилотно летало уништивме моќен руски дрон во лет“

Украинските сили соборија руски повеќенаменски дрон Zala Kub со помош на беспилотно летало FPV, а снимката од акцијата беше споделена на социјалните мрежи од украинскиот волонтер Серхи Стерненко, пренесува „Милитарњи“.
„Таквото летало можеше да предизвика голема штета, па затоа е одлично што беше уништен во воздух“, рече Стерненко.
Zala Kub е дизајниран за прецизни удари на копнени цели – кога ќе ги открие, вертикално навлегува и исфрла експлозивен товар на горниот дел од возилото, каде што тенковите и оклопните возила се најранливи поради нивниот потенок оклопен слој.
Ова беспилотно летало е развиено од рускиот концерн „Калашников“, а првпат беше прикажано во 2019 година на меѓународната воена изложба IDEX во Обединетите Арапски Емирати.
Украина долго време користи беспилотни летала FPV како пресретнувачи за уништување руски летала. Ваквите дронови, во зависност од опремата, како дневни и термални камери, чинат меѓу 1.600 и 2.500 долари. Тие може да летаат со брзина до 160 километри на час, да имаат дострел до 35 километри и да останат во воздухот до еден час.
Европа
Судот ќе ја изрече пресудата за Депардје во мај

Кривичниот суд во Париз во четвртокот објави дека на 13 мај ќе ја изрече пресудата за актерот Жерар Депардје за сексуално вознемирување две жени за време на снимањето филм во 2021 година.
Француското Обвинителство во четвртокот побара 18-месечна условна казна и глоба од 20.000 евра за Депардје, објави весникот „Ле Паризиен“ и другите медиуми.
Седумдесет и шестгодишниот Депардје, истакната личност во француската кинематографија, е обвинет за сексуално вознемирување две жени за време на снимањето филм од 2021 година. Ова е првпат актерот, кој се соочува со многубројни обвинувања за сексуално вознемирување во текот на годините, да биде изведен пред суд.
Депардје призна дека ја фатил една од жените за бутот, но негира дека тоа е напад. Неговиот адвокат рече дека наводите против клиентот се лажни и дека истражителите биле пристрасни.
Европа
(Видео) Нереални снимки од протестот: Пикачу ги поддржа граѓаните во Турција

Надреално видео од Покемон кој наводно бега од полицијата за време на протестите во Турција стана вирална. Имено, некој облечен како Пикачу е снимен како бега од полицијата која брка демонстранти. Снимката наводно е направена во Анталија.
Виралното видео, кое нашироко се споделува на социјалните мрежи, се чини дека потекнува од турскиот фоторепортер Исмаил Коцероглу.
Исмаил во четвртокот објави видео на својот Инстаграм профил, на кое се гледа како костимиран демонстрант бега со толпа граѓани.
Дали е автентична снимката на која Пикачу бега од полицијата не е потврдено.
Сепак, Исмаил продолжи да поставува видеа од овој маскиран демонстрант. Синоќа, тој повторно објави видео од Пикачу како шета низ улиците на Анталија, наведувајќи дека Пикачу „се приклучил на осмиот ден од демонстрациите“.