Европа
Европски избори: Ниска излезност во Хрватска, Унгарија со најмногу гласачи

Првите податоци за излезноста на изборите за Европскиот парламент во земјите во кои денеска се гласа, покажуваат различен одзив на гласачите до 11 часот – од седум отсто во Хрватска до 22 отсто во Унгарија.
Мнозинството земји од ЕУ гласаат денеска, додека некои веќе гласаа во петок и сабота.
До 11:30 часот гласале 7,69 отсто од гласачите во Хрватска, што е за повеќе од два отсто помалку отколку на изборите во 2019 година, кога излезноста беше 9,93 отсто.
Нешто повеќе од 3,7 милиони гласачи во Хрватска избираат 12 хрватски пратеници кои ќе ги претставуваат во Европскиот парламент во следните пет години.
Првите резултати ќе бидат објавени во 23 часот, а резултатите од излезните анкети во 19 часот.
Во Словенија до 11 часот излезноста била 11,88 отсто, што е за три процентни поени повеќе од пред пет години, покажуваат податоците на Националната изборна комисија, пренесува СТА.
Словенците избираат девет пратеници во ЕП, а гласачките места се затвораат во 19 часот.
Во Бугарија, според податоците на изборната комисија, излезноста до 11 часот на гласањето за националниот и европскиот парламент била околу 8,5 отсто, пренесува Ројтерс.
Значително поголем одѕив е забележан во Унгарија. До 11 часот на гласање излегле 22,89 отсто или речиси два милиони гласачи. Ова е значително повеќе отколку во 2019 година, кога одѕивот на гласачите до 11 часот беше околу 17 проценти.
Во Грција до 11:30 часот гласале 1.260.931 гласач или 13,1 отсто од запишаните избирачи, јавуваат грчките медиуми.
Во Романија до 13 часот гласале 21,93 отсто од избирачите со право на глас на изборите за Европскиот парламент.
Во Франција до пладне гласале 19,81 отсто од граѓаните со право на глас.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Ковчегот на папата Франциско затворен, погребот в сабота наутро

Од средата наутро, кога телото на покојниот папа Франциско беше пренесено во базиликата „Свети Петар“, низ неа поминаа 150.000 луѓе од целиот свет. Ковчегот на папата беше затворен вечерва, а погребот ќе се одржи в сабота наутро.
Пред церемонијата на запечатување, во ковчегот на папата беа поставени 12 монети, по една за секоја година од неговиот понтификат, како и краток запис и извештај за неговото папство. Церемонијата ја водеше кардиналот Кевин Фарел, камерлегно на Светата Римска црква.
Реки верници доаѓаат во Рим за да присуствуваат на утрешниот погреб на папата Франциско, а се очекува и пристигнување на бројни делегации од целиот свет.
Во Рим се воведени строги безбедносни мерки, со илјадници волонтери и полицајци, систем против дронови, снајперисти на покривите и борбени авиони подготвени за полетување.
Европа
Жена во Шпанија ја продала новородената ќерка за 2.000 евра на двојка која не можела да има деца

Шпанската полиција уапси 37-годишна жена која ја продала својата новородена ќерка на пар кој се лекува од неплодност, јавува АФП.
Полицијата соопшти дека жената била уапсена минатиот месец во Мостолес, јужно предградие на Мадрид. Брачен пар осомничен за купување дете и двајца нивни роднини беа уапсени во јужниот град Кордоба.
Според прелиминарната истрага, жената се согласила да им ја предаде својата новородена ќерка на двојката за 2.000 евра. Сепак, по породувањето, таа се предомислила и побарала да ѝ го вратат детето.
Двојката, според АФП, одбила да го врати бебето освен ако жената не им го врати платениот износ, плус дополнителни 1.000 евра за покривање на трошоците што тврделе дека ги направиле во текот на месецот што го поминале со неа во Кордоба пред да се роди детето.
Полицијата започна истрага откако една жена поднесе жалба тврдејќи дека семејство во Кордоба го „киднапирало“ нејзиното новородено бебе. Детето е предадено во центар за заштита на деца во Кордоба. Полицијата, исто така, објави дека властите ѝ одзеле уште шест деца на жената во 2022 година поради занемарување.
Европа
Зеленски: Подготвени сме да разговараме за територија, но само под еден услов

Украинскиот претседател Володимир Зеленски изјави денес дека Украина ќе биде подготвена да разговара за територијални прашања како дел од мировните преговори, но само откако Русија ќе се согласи на целосен и безусловен прекин на огнот.
„Целосно и безусловно примирје отвора можност да се разговара за сè“, изјави Зеленски пред новинарите во Киев.
Тој ја коментираше и изјавата на американскиот претседател Доналд Трамп, кој во интервју за „Тајм“ изјави дека „Крим ќе остане со Русија“.
„Она што го кажува претседателот Трамп е вистина. Се согласувам со него дека денес немаме доволно оружје за да ја вратиме контролата врз Кримскиот Полуостров“, рече Зеленски.
Да потсетиме дека украинските претставници претходно решително ја отфрлија можноста за какви било територијални отстапки во замена за мир со Русија.