Европа
Захарова до Французите: Да се надеваме дека проектилите нема да ја погодат вашата амбасада во Москва

Портпаролката на руското Министерство за надворешни работи Марија Захарова ги предупреди француските власти дека ракетите со долг дострел што треба да се испратат во Украина може да ја погодат француската амбасада во Москва.
На прес-конференција во Москва, Захарова ја критикуваше изјавата на францускиот министер за одбрана Себастиен Лекорну, кој во понеделникот потврди дека наредил префрлање на најмалку десет проектили со долг дострел Скалп во Украина и додаде дека се надева оти Киев ќе може да извршуваат напади надвор од линијата на фронтот, што значи на руска територија.
„Би сакала да му го кажам ова на Себастиен Лекорну, кога режимот во Киев ќе удри надвор од линијата на фронтот, да се надеваме дека нема да ја погоди француската амбасада во Москва“, рече Захарова. Таа истакна дека европските претставници вложиле напори да ги убедат САД да и дозволат на Украина да истрела ракети со долг дострел на руска територија.
Таа додаде дека британскиот премиер Кир Стармер и францускиот претседател Емануел Макрон сакаат да го принудат американскиот претседател Џо Бајден да ја укине забраната за таргетирање на руска територија пред да му заврши мандатот во јануари. Захарова тврди дека тоа покажува дека Западот не сака мир, туку „има намера преку Украина да води хибридна војна против Русија“.
„Сакаме да ги потсетиме Вашингтон, Лондон, Париз и Брисел дека сè уште си играат со оган. Рускиот претседател Владимир Путин јасно кажа дека дозволата на Украина за такви напади ќе се смета како вистински влез на земјите од НАТО во директен вооружен конфликт со Русија“, нагласи Захарова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски пристигнува на погребот на папата

Украинскиот претседател Володимир Зеленски ќе присуствува на погребот на папата Франциско, пренесе АФП повикувајќи се на извор од украинскиот претседателски кабинет.
Според истиот извор, канцеларијата на Зеленски ја подготвува неговата посета на Рим за Зеленски лично да се прости од поглаварот на Католичката црква.
Како што претходно беше најавено, погребот на папата Франциско ќе се изврши в сабота, 26 април, во 10 часот по локално време. Досега Трамп и Макрон потврдија дека ќе бидат на погребот, но се очекува да присуствуваат многубројни светски лидери и стотици илјади верници.
Европа
Украина: Русите го зголемуваат военото присуство во Мариупол

Руските сили продолжуваат да го зголемуваат своето воено присуство во привремено окупираниот град Мариупол. Како што соопшти денеска на „Телеграм“ градскиот совет на Мариупол, во градот веќе се формирани две воени бази.
„Руските окупатори го прошируваат своето воено присуство во Мариупол“, се вели во соопштението.
Според Центарот за проучување на окупацијата, во текот на март и април 2025 година се појавиле две нови воени бази: една во областа Калмиус на северозапад од градот и логистичка база во областа Ливобережњи, во станбената зона Шхидни. Втората база, како што се наведува, главно се користи за сместување персонал и воена опрема.
„На овој начин руските окупатори постепено го зголемуваат своето присуство во Мариупол. Центарот за проучување на окупацијата нагласува дека ова е план за трансформирање на градот во главна и полноправна логистичка и воена база не само за стоки туку и за опрема и персонал, со широка мрежа на паркинзи, бази за поправка и точки на трајно и привремено распоредување персонал. Ова е олеснето и со развојот на железничките и пристанишните врски што ги спроведуваат окупаторските власти“, се вели во соопштението на градскиот совет на Мариупол.
Европа
Знамиња со кукасти крстови се појавија во Стокхолм на роденденот на Хитлер, полицијата почна истрага

Три нацистички знамиња со кукасти крстови беа поставени на влезот на автопат во областа Есингеледен во Стокхолм, главниот град на Шведска, на 20 април, на роденденот на Адолф Хитлер.
Портпаролот на полицијата во Стокхолм, Матс Ериксон, изјави дека започнале истрага за злосторство од омраза.
Ериксон нагласи дека не е соодветно да се случуваат такви работи во Шведска. Тој посочи дека на влезовите на автопатите често се појавуваат транспаренти со политички пораки.
„Конкретно активистите споделуваат политички пораки бидејќи тука има густ сообраќај. Не е убаво да се споделуваат такви пораки“, рече Ериксон.
Тој додаде дека нацистичкото знаме најверојатно било поставено за да го одбележи роденденот на нацистичкиот диктатор Адолф Хитлер, кој е роден на 20 април.